Аграрон кусджытæ исынц хъæууон хæдзарады министрадæй гранттæ
Республикæйы ахадгæйæ рæзы хъæрмуатон хæдзарадты архайд. Аграрон кусджытæ исынц хъæууон хæдзарады министрадæй гранттæ. Ныридæгæн ведомствæйы фæрæзты фæрцы кусы 30 хъæрмуатон куыстуатæй фылдæр. Министрад æмæ районты профилон управленитæ ма кæнынц консультацион æххуыс дæр. Бæлвырддæр радзурдзæн Хъайтмазты Дзерассæ.
Туаты Эдуард халсартæ хъæрмуаты зайын кæныны куыст 5 азæй фылдæр кæны. Хæдзарад скодта йæ зæххы хайы. Ныртæккæ йæм ис 2 стыр хъæрмуаты, иу та чысылдæр – садзæнтæн. Эдуард куыд зæгъы, афтæмæй зын куыст у, фæлæ ис хорз бæрæггæнæнтæ.
Ныртæккæ Эдуард зайын кæны джитъритæ. Уæрæсейаг хуыз у. Куыд зæгъы, афтæмæй сæм хъæуы æдзух æмæ лæмбынæг цæстдард. Хъæуы бæлвырд температурон фæтк, æмбæлгæ уымæлад, стæй хъæрмуатмæ æдзух сыгъдæг уæлдæф уадзын. Цæст дарын ма хъæуы алы зайæгоймæ дæр хицæнæй, уымæн æмæ йæ бон у фæрынчын уæвын æмæ низ иннæтыл апарахат кæнын. Туаты Эдуард йæ продукци республикæйы уæй кæны. Йæ ныхæстæм гæсгæ, хъæрмуатон хæдзарады райрæзт хорз фадат дæтты импортон халсартæ бынæттонтæй ивынæн.
Эдуарды фæндты ма ис помидортæ æмæ басгæрдæг зайын кæнын, уымæн та хъæуынц уæлæмхасæн хъæрмуаттæ. Раздæр хъæууон хæдзарады министрадæй райста грант, æмæ та ацы аз фæнд кæны курдиат бадæттын хъæрмуатон хæдзарад фæуæрæхдæр кæнынæн.
Ныртæккæ республикæйы ис, гранттæ чи райста, ахæм 30 хъæрмуатон хæдзарадæй фылдæр. Се ппæтмæ дæр цæст дары хъæууон хæдзарады министрад, зæгъы ведомствæйы разамонæджы хæдивæг Къадзаты Игорь. Æдзух ма аразынц консультацитæ фермертæн.
Ныртæккæ Горæтгæрон районы аразынц стыр хъæрмуатон комплекс. Йæ фæзуат уыдзæн 62 гектары. Ацы инвестицион проект фæзындзæн республикæйы аграрон къабазы райрæзтыл æмæ æххуыс кæндзæн мидбазар хъæууон хæдзарадон продукцийæ æххæст кæнынæн.
