Уыцы хъуыддаджы сын баххуыс кæндзысты Цæгат Ирыстоны паддзахадон университеты студенттæ
Республикæйы амалхъом адæмæн нырæй фæстæмæ æнцондæр уыдзæн барадон фарстатæ лыг кæнын. Уыцы хъуыддаджы сын баххуыс кæндзысты Цæгат Ирыстоны паддзахадон университеты студенттæ. Юридикон клиникæйы лæвар консультацитæ кæнынц бизнесы минæвæрттæн. Цавæр фарстатимæ бацæуæн ис центрмæ, уый тыххæй радзурдзæн Тъехты Элинæ.
Ацы дуры куыстгæнæг завод фæзынд æрæджы. Куыстуат арæзт æрцыд хи инвестицитæй. Цехты раздæры фæзуат уыд 4 мин квадратон метры, фæлæ инвестпроекттæ æххæстæй царды куы рауадзой, уæд дзы нысан кæнынц мин куысты бынаты онг саразын.
Дуры куыстгæнæг заводы разамонджытæ æндæр бизнесментимæ систы Уæрæсейы промышленникты æмæ амалхъом адæмы цæдисы уæнгтæ. Лæвар юридикон æххуысы тыххæй бадзырд бафыстой цæдисы регионалон хайады сæрдар Хъодзаты Алан æмæ ЦИПУ-йы ректор Огъуаты Алан. Уыцы хъæппæрис фæзынд бизнесæн æххуыс кæныны тыххæй ныгуылæн бæстæты санкциты рæстæг.
Куыстуæттæн цæмæй баххуыс кæной, уый тыххæй хъуамæ уой цæдисы уæнгтæ. Ныр Ирыстоны амалхъом адæмæн æнцондæр уыдзæни юридикон фарстатæ лыг кæнын.
Амалхъом адæмæн лæвар æххуыс кæндзысты ЦИПУ-йы юридикон клиникæйы. Кусы 14 азы. Ам студенттæ сæ ахуыргæнджытимæ адæмæн кæнынц барадон æххуыс. Фæлæ уал уый размæ фидæны юристтæ ацæуынц сæрмагонд теоретикон æмæ практикон ахуыртæ.
Æппæтæй арæхдæр фарстатæ баст вæййынц зæххы хæйтты приватизациимæ, бынтимæ æмæ бинонты ахастдзинæдтимæ. Фидæны юристтæ баххуыс кодтой бирæ адæмæн, ныр та ма консультацитæ кæндзысты бизнесментæн дæр.
