Бирæтæ систы Уæрæсейы ерысты æмæ чемпионатты уæлахиздзаутæ
1962-æм азы бæхты спорты секцийы бындурыл Цæгат Ирыстоны байгом кодтой республикæйы бæхты спортивон скъола. Уал азы куыстмæ йæ хъомылгæнинæгтæ систы спорты мастертæ, алыхуызон турнирты уæлахиздзаутæ. Уымæй дарддæр бирæтæ систы Советон Цæдисы æмæ Уæрæсейы Федерацийы иугонд командæты уæнгтæ. Суанг ма уыдысты Советон Цæдисы олимпаг командæйы уæнгтæ дæр. Абон дæр спортивон скъолайы архайджытæ дарддæр хæццæ кæнынц хорз традицитæ. Бирæтæ систы Уæрæсейы ерысты æмæ чемпионатты уæлахиздзаутæ. Афæдзæй-афæдзмæ бæхты спорт кæны парахатдæр. Ныртæккæ нæ республикæйы бæхты спортивон скъолайы лæвар архайынц 100 адæймаджы онг. Бæхты спорты скъолайæн ис хорз традицитæ. Ивгъуыд æнусы 60-йæм азты Советон Цæдисы иугонд командæимæ Олимпаг хъæзтыты архайдта Гуыдиаты Хъазыбег. Скъолайы раздæры директор Хъыбызты Фердинанд та уыд мæскуыйаг олимпиадæйы архайæг. 80-йæм азы уый æртæ хатты сси Советон Цæдисы ерысты уæлæхиздзау. Тренерты ныхæстæм гæсгæ, скъолайы ис, зындгонд спортсменты хъуыддæгтæ дарддæр чи хæццæ кæна, ахæм курдиатджын фæсивæд. Кæд Советон Цæдисы бæхты спорты архайджытæ уыдысты лæппутæ, уæд ныр ардæм цæуынц чызджытæ дæр.
