Хистæркъласонтимæ кусынц хуыздæр педагогтæ
Цæгат Ирыстоны сæргълæууæг Сергей Меняйлойы хæслæвæрдмæ гæсгæ республикæйы байгом кодтой иумæйаг паддзахадон фæлварæнтæм цæттæ кæныны лæвар центртæ. Хистæркъласонтимæ кусынц хуыздæр педагогтæ. Центртæ кусынц республикæйы æппæт районты. Дзæуджыхъæуы сты 3, Горæтгæрон районы – 2, æмæ фæйнæ иуы – иннæ районты. Скъоладзауты хсæн сты тынг парахат. Бæлвырддæр радзурдзæн Хъайтмазты Дзерассæ.
Цорæты Зæринæ ахуыр кæны 11-æм къласы. Ныридæгæн бæлвырд зоны, йæ фидæн цавæр дæсныйадимæ сбæтдзæн, уый. Ахæццæ кæндзæн бинонты династи. Сты медицинон кусджытæ. Ацы хъуыддагмæ фыццаг къахдзæф у – иумæйаг паддзахадон фæлварæнтæ хорз радтын. Хистæркъласон сæрды йæхи цæттæ кæнын райдыдта репетиторимæ, фæлæ центр куы байгом, уæд æй бафæндыд скъолайы уæлæмхасæн ахуыртæй пайда кæнын. Зæринæ куыд зæгъы, афтæмæй ахуырадон процесс тынг цымыдисаг у.
Центры ахуырты фæтк сарæзтой афтæ, цæмæй сæйраг ахуырадон процесс ма къуылымпы кæна. Скъолайы æрмæджы иу хайыл сывæллæттæ сæхæдæг бакусынц. Цæмæй рауагъдон кълæсты ахуырдзаутæн центртæ цы скъолаты бындурыл кусынц, уыдонмæ æнцондæр цæуын уа, уый тыххæй сын самал кодтой транспорт.
Цæттæ та сывæллæтты кæнынц хуыздæрты хуыздæртæ. Ахуыргæнджытыл бæрнон хæс æвæрд ис. Хъæуы сæ лæмбынæг бамбарын кæнын алы зын хæслæвæрд дæр, æмæ æппæтæй хинæйдзагдæр фæлварæн фæрстытæн хуымæтæг дзуæппытæ радтын.
Иумæйаг паддзахадон фæлварæнтæм цæттæ кæныны лæвар центртæ байгом сты республикæйы сæргълæууæджы хæслæвæрдмæ гæсгæ. Ныртæккæ кусынц Цæгат Ирыстоны алы районы дæр. Æппæтæй фылдæр центртæ ис Дзæуджыхъæуы æмæ Горæтгæрон районы. Специалисттæ куыд зæгъынц, афтæмæй ахсджиаг у, цæмæй сывæллон æрмæст фæлварæн ма радта, фæлæ ма райса æппæтæй бæрзонддæр балл. Уый цæгатирыстойнаг абитуриенттæн байгом кæндзæн бæстæйы хуыздæр уæлдæр ахуыргæнæндæттæм дуæрттæ.
Министрады ныридæгæн зæгъынц, центртæ хистæркъласонты хсæн парахат кæй сты. Бирæтæ æвзарынц уæлæмхасæн ахуыртæ скъолайы. Профилон ведомствæйы ма фæнд кæнынц, бакусын ахæм проектыл 9-æм кълæсты ахуырдзауты паддзахадон фæлварæнтæм цæттæ кæнынæн.
