Уым канд специалисты консультаци райсæн нæ уыдзæн, фæлæ ма скæнын алыхуызон иртæстытæ
Дохтырмæ бацæуын нырæй фæстæмæ уыдзæн æнцондæр. Бæлвырддæр та афтæ – республикæйы дæрддзæф хъæутæм цæуын райдыдта мобилон медицинон комплекс. Уым канд специалисты консультаци райсæн нæ уыдзæн, фæлæ ма скæнын алыхуызон иртæстытæ. Зæгъæм, УЗИ, кардиограммæ, æмæ ма суанг чысыл лабораторийы æмбæлгæ анализтæ раттын. Бæлвырддæр хабæрттæ радзурдзæн Хъайтмазты Дзерассæ.
Фыццаг пациенттæн мобилон медицинон комплекс балæггад кодта мæйы размæ Михайловскæйы. Ацы хатт та цæлхытыл поликлиникæ æрцыд Суадагмæ. Боциты Фатимæ сфæнд кодта йе нæниздзинад сбæлвырд кæнын. Уымæн ын æххуыс ацы комплекс. Æххæст у æппæт хъæугæ кусæнгæрзтæй медицинон иртæстытæ кæнынæн.
Боциты Фатимæ: «Дохтыртæн мæхи фенын кæнон. Рисгæ куы ницы кæна, уæддæр дохтыртæ фæзæгъынц, кæй хъæуы цæст дарын æнæниздзинадмæ. Уый тыххæй æрбацыдтæн. Хæстæг цæрын æмæ æрбауадтæн. Стæй хъæу иууылдæр дзæбæх цæуынц. Иууылдæр ам стæм. Удæнцой у ацы хабар».
Ахæм мобилон центртæ хорз сты, æрмæст фельдшер нæ, фæлæ дзы специалистты æнæхъæн бригад кæй вæййы, уымæй. Рынчынæн сæ бон у скæнын ультразвукон иртæст, кардиограммæ кæнæ анализтæ райсын чысыл-лабораторийы.
Гайты Розæ: «Тынг æхсызгон нын уыди Суададжы цæрджытæн ахæм уавæртæ кæй сарæзтой. Тынг удæнцæйттæ федтам ныр».
Ацы комплекс республикæйы иунæг у. Фæнд ма кæнынц ноджыдæр иу балхæнын. Машинæ райстой Великий Новгородæй компанийæ. Специалисттæ куыд зæгъынц, афтæмæй низ ма руадзын æнцондæр у, цæйнæфæнды йæ дзæбæх кæнын.
Мобилон комплексы директоры ныхæстæм гæсгæ, медцентры æрбацыдмæ æхсызгонæй æнхъæлмæ кæсынц бирæ хъæуты. Комплексы фыццаг бонтæй куыстой Новгородæй медиктæ. Ныр та адæмæн лæггад кæнынц Цæгат Ирыстоны фæлтæрдджын дохтыртæ.
Ам æрмæст медкомплекс нæй. Ис ма дохтырты ласынæн автобус дæр, стæй анализтæ æрвитынæн автомобиль. Комплекс кусы афæдзы дæргъы. Æппæт процедурæтæ дæр рынчынтæн кæнынц лæвар.
