Скъолайы агъоммæ 2 ног ахуыргæнæндоны фæзынд Горæтгæрон районы
Республикæйы дарддæр гом кæнынц сывæллæтты ног рæвдауæндæттæ. Скъолайы агъоммæ 2 ног ахуыргæнæндоны фæзынд Горæтгæрон районы. Уыдонæй иу Джызæлы. Бынат дзы уыдзæн 120 сабийæн. Рæвдауæндоны ис 5 кары къорды – 2-йæ 7 азы онг кæуыл цæуы, ахæм сывæллæттæн. Хъазæн агъуыст, хуыссæнуат, музыкæйæ æмæ физкультурæйæ архайынæн зал. Уагдон æххæст у нырыккон кусæнгæрзтæй æмæ дзуапп дæтты ахуырадон стандартты домæнтæн. Ныры онг Джызæлы уыд æрмæстдæр иу рæвдауæндон.
Ног рæвдауæндон байгом Дæллаг Санибайы дæр. Хъæуы, скъолайы агъоммæ ахуыргæнæндон уæвгæ дæр никуы уыд. Уым дæр бынат уыдзæн 120 сабийæн. Ис сын æппæт æмбæлгæ уавæртæ. Аивгонд у уагдоны алыварс территори дæр. Рæвдауæндæттæ арæзт æрцыдысты нацпроект «Демографи»-мæ гæсгæ. Радих сын кодтой 200 милуан сомы онг – уыдон сты федералон æмæ республикон фæрæзтæ. Азы кæронмæ ма республикæйы байгом кæндзысты ноджыдæр 6 рæвдауæндоны.
