Уый тыххæй аппаратон æмбырды фехъусын кодта фæлхасадмæ цæстдарды управленийы разамонæг
Республикæйы эпидемиологон уавæр раздæрау у рæстæмбисæй фылдæр. Уый тыххæй аппаратон æмбырды фехъусын кодта фæлхасадмæ цæстдарды управленийы разамонæг. Ивгъуыд къуыримæ фæфылдæр коронавирусæй рынчынты нымæц дæр. Уый хыгъд фæкъаддæр рынчындоны æрæвæрын кæй хъæуы, ахæмты нымæц. Фылдæр рынчын кæнынц сывæллæттæ. Ацы бонты республикæйы æппæт скъолатæ, рæвдауæндæттæ æмæ уæлдæр ахуыргæнæндæттæ раивтой дистанцион ахуырадмæ. Сергей Меняйло бахæс кодта уавæрмæ цæстдарын. Кæд хъуыддаг фæхуыздæр уа, уæд æрвылбоны фæткмæ гæсгæ ахуырад раивдзысты 27-æм февралы. Ацы къуыри республикæ æнхъæлмæ кæсы бирæ туристтæм. Сергей Меняйло бадомдта, куыст фæкарздæр кæнын. Куыд загъта, афтæмæй сæйраг æргом здахын хъæуы адæмы æдасдзинадмæ.
Республикæйы фæнд кæнынц дыууæ стоматологон цæугæ медицинон комплексы балхæнын. Ныридæгæн курдиат æрвыст æрцыди Уæрæсейы æнæниздзинадхъахъхъæнынады министрадмæ. Фæлæ регионы профилон министр Тебиаты Сослан куыд загъта, афтæмæй сын сæ курдиат федералон куыстуат нæ банымадта. Иу комплексы аргъ у 10 милуан сомы. Сергей Меняйло финансты министрадæн бахæс кодта, бюджеты фæрæзтæм ногæй æркæсын, æмæ комплекстæ балхæнынæн æхца радих кæнын. Уымæй уæлдай, фæрæзтæ ссарын хъæуы, Дзæуджыхъæуы 2-æм арæндоны бындурон цалцæгæн дæр. Йæ проектон-сметон документацийæн ын скодтой экспертизæ. Куыстытæ сæххæст кæнынæн хъæуы 92 милуан сомы. Дур-Дуры та фæнд кæнынц ног рæвдауæндон саразын. Хъуамæ уа 120 бынатæн. Ныртæккæ дзы чи ис, уый домæнтæн дзуапп рагæй нал дæтты, стæй йæ сцалцæг кæнæн дæр нал ис. Æмбырды ма куыд фехъусын кодтой, афтæмæй ивгъуыд къуырийы Цæгат Ирыстонмæ Донбассæй ссыди 50 æвзонг спортсмены æмæ ма семæ 4 хистæры. Æрбынат кодтой санаторий «Тæмисчъы». Рæзгæ фæлтæрæн тренировкæтæ скодтой уæгъдибар хъæбысхæстæй, гимнастикæйæ æмæ дзюдойæ. Уазджытæ фæстæмæ сæхимæ ацæудзысты 27-æм февралы. Фæллойы æмæ социалон рæзты министрады куыд загътой, афтæмæй Донбассæй спортсментæ нæ республикæмæ цæудзысты рæстæгæй-рæстæгмæ.
