Нодары хонынц Орджоникидзейы «Спартачы» æппæтæй арæхстджындæр футболист.
Абон республикæйы фæстаг фæндараст загътой легендарон футболист Нодар Папелишвилийæн. Æрбацыдысты йæ хæлæрттæ, йæ хъомылгæнинæгтæ стæй сæдæгай футболуарзджытæ. Нодары хонынц Орджоникидзейы «Спартачы» æппæтæй арæхстджындæр футболист. Кæдфæндыдæр йæ ныхмæлæууæгæн уыди тæссаг.1969-æм азы йæ разамындæй «Спартак» йæ историйы фыццаг хатт путевкæ райста Советон Цæдисы чемпионаты уæлдæр дивизионмæ. Йæ фарсхæцджытæ йæ уарзтой, йæ дæсныйадыл иузæрдион кæй уыди, уый тыххæй. Бирæтæ абон йæ зианы уæлхъус æрымысыдысты, Нодар æндæр командæтæм кæй никуы акуымдта, уый. Хуыдтой йæ бирæ хъуыстгонд командæтæм, фæлæ йæ хъуыдыйы дæр никуы æрцыди, йæ уарзон командæ ныууадзын. Уарзта йæ клуб æмæ Ирыстон, йæ фарсхцæджыты. Дæсгай азтæ Нодар куыста сывæллæттимæ. Йæ активон архайдæй Дзæуджыхъæуы фæзынди спортивон скъола «Юность». Схъомыл кодта бирæ зындгонд футболистты, абон сты дунеон командæты хыгъды. Нодар Попелишвилийыл цыди 79 азы.
