Микрорайоны фидæны 1-æм къласонтæн та бынæттæ цæттæ кæнынц æндæр скъолайы
Иннæ азæй фæстæмæ республикæйы физикон-математикон лицей сывæллæтты исдзæн конкурсы бындурыл, стæй æрмæстдæр 5-æм къласæй. Ахæм уавæр дзы сæвзæрд æцæгæйдæр курдиатджын чи у, ахæм сывæллæттæн дзы се ппæтæн бынат кæй нæ фаг кæны, уымæ гæсгæ. Микрорайоны фидæны 1-æм къласонтæн та бынæттæ цæттæ кæнынц æндæр скъолайы. Бæлвырддæр Касаты Наирæйы æрмæджы.
Мæрзойты Олег республикæйы физикон-математикон лицейы ахуыргæнинаг сси математикон олимпиадæты бæрæггæнæнтæм гæсгæ. Ам ахуыр кæны æртыккаг аз. Алагиры скъолайы лæппу бæрæг дардта, бæлвырд наукæтæм разæнгард кæй уыди, æмæ йын дзы æнтыстдзинæдтæ дæр кæй уыди, уымæй.
Физикон-математикон лицейы ахуыр кæнынц курдиатджын сывæллæттæ, сты республикæйы алы районтæй. Цæмæй рæстæг дæр æмæ фæрæзтæ дæр фæндагыл ма хардз кæной, уый тыххæй сын дзы арæзт æрцыди аккаг уавæртæ æмæ фадæттæ. Хуыссæнуæттæ, ахуыртæн кълæстæ, ирхæфсæн агъуыстытæ. Иу ныхасæй алыцæдæр, цæмæй сывæллæттæн наукæйы бæрзæндтæм схизынæн къуылымпыдзинæдтæ ма уа. Фæлæ кæй фæнды æмæ фаг цæттæдзинад кæмæ ис, уыдонæн дæр дзы се ппæтæн ахуыр кæныны фадат нæй. Нæ дзы фаг кæны бынæттæ. Цæмæй уавæр гыццыл банывыл кæной, уый тыххæй хаст æрцыди уынаффæ, райдиан кълæстæм сæрмагонд фæткмæ гæсгæ исын. Иннæ азæй фæстæмæ, лицеймæ исдзысты конкурсы хатдзæгтæм гæсгæ, стæй, æрмæстдæр 5-æм къласæй.
2-æм, 3-æм æмæ 4-æм кълæсты ахуырдзаутæн сæ бон у райдиан скъола лицейы фæуын, фæлæ 5-æм къласмæ бацæудзысты конкурсы бындурыл. Ацы микрорайоны фидæны 1-æм къласонтæн та бынæттæ цæттæ кæнынц 12-æм скъолайы. Тагъд дзы райдайдзысты бындурон цалцæггæнæн куыстытæ. Сабыргай уырдæм ивд æрцæудзысты лицейы райдиан кълæсты ахуыргæнджытæ дæр.
