Бакуыстой йыл скъолатæн хæринаггæнæн Комбинаты специалисттæ
Республикæйы физикон-математикон лицейы бацæттæ кодтой ноггонд меню. Бакуыстой йыл скъолатæн хæринаггæнæн Комбинаты специалисттæ. Нырæй фæстæмæ дзы уыдзæн ног хæринæгтæ. Уыдонæй ацаходыны фадат уыд ныййарджытæн, ахуырады министрады æмæ районты минæвæрттæн, стæй хæдбар хæринаггæнджытæн. Чехойты Фатимæ радзурдзæн бæстондæр.
Скъолайы хæрæндоны хæрздæф, раст цыма хæринæгтæ паддзахы стъолæй сты – гречка по-купечески, горбуша æмæ булгур халсартæ æмæ дзидзаимæ. Ахæм меню дзæуджыхъæуккаг хæринаджы комбинаты технологтæ сфæнд кодтой ныййарджыты размæ рахæссын. Дегустаторты зæрдæтæ балхæнын æнцон хæс нæ уыд. Се *хсæн æрмæст ныййарджытæ нæ уыдысты, фæлæ ма республикæйы ахуырады æмæ наукæйы министрады кусджытæ æмæ хæдбар хæринаггæнджытæ.
Ахъаззаг хæринагæн хæрзад уæвæн ис, æви нæ – æнусты ныхмæлæудæн хатдзæг скæнын – уыд, менюйыл чи бакуыста, уыдоны нысан. Ног азæй нырмæ ахуыргæнæндæтты меню ноггонд æрцыд 30 %. Ныр ныййарджыты размæ рахастой хæринаджы 8 хуызы. Ныридæгæн сæ цæттæ кæнынц скъолаты хæрæндæтты.
Слонаты Константин ахуыр кæны Республикæйы физикон-математикон лицейы 11-æм къласы. Йæхи цæттæ кæны фæлварæнтæм. Æрыгон лæппуйæн ахсджиаг сты хæринаджы хуызтæ æмæ сæ хæрзхъæддзинад.
Фондз баллæн аргъ скæнын ног хæринæгтæн – хуымæтæг хæс нæ уыд. Алы ныййарæг дæр, фыццаджыдæр хъуыды кæны, йæ сывæллоны зæрдæмæ цы фæцæудзæн, ууыл. Цæгат Ирыстоны 55 мин скъоладзауæн сæ бон у лæвар хæрын сæ ахуыргæнæндæтты.
Дегустаци фæци. Йæ архайджыты хъуыдытæ хынцгæйæ скъолаты меню дарддæр дæр ноггонд цæудзæн, цæмæй сывæллæттæн хæринаг æрмæст ахъаззаг нæ, фæлæ ма хæрзад дæр уа, уый тыххæй.
