Ивгъуыд къуыримæ сывæллæтты хсæн эпидемиологон къæпхæн ахызт 52 процентæй
Республикæйы фылдæр кæны гриппæй æмæ æхснырсæгæй рынчынты нымæц. Ивгъуыд къуыримæ сывæллæтты хсæн эпидемиологон къæпхæн ахызт 52 процентæй. Ахуырадон процесс æрлæууын кодтой цалдæр скъолайы æмæ рæвдауæндоны. Ныртæккæ ахсджиаг у профилактикон мадзæлттæ æххæст кæнын, – зæгъынц дохтыртæ. Бæлвырддæр хабæрттæ радзурдзæн Хъайтмазты Дзерассæ.
Гæздæнты Иринæ æмæ Георгий æрбацыдысты бæлвырдгæнæн æркастмæ. Сывæллæттæ уыдысты рынчын. Дохтыр сæм лæмбынæг æркаст. Ахуырмæ арвитыны размæ, хъæуы сбæрæг кæнын, чысыл пациент æххæстæй кæй сдзæбæх. Къуырийы райдианæй грипп æмæ æхснырсæгæй чи фæрынчын, уыцы сывæллæтты нымæц 52%-ы фæфылдæр. Арæхдæр дохтыртæм райдыдтой хæдзæрттæм дæр дзурын. Сывæллæттæ инфекцитæм лæмæгъдæр сты, сæ иммунитет кæронмæ кæй нæма сфидар, уымæ гæсгæ. Грипп тæссаг у уæззау фæстиуджытæй.
Леуанты Фатимæ, РЦИ-А æнæниздзинадхъахъхъæнынады министрады сæйраг æнæштатон педиатр: «Ныртæккæ мæ фæнды æппæт ныййарджытæн зæгъын, цæмæй сæ сывæллæттæм афойнадыл дзурой дохтырмæ, цæмæй сын афойнадыл кæной æххуыс, уымæн æмæ ныртæккæ низтæ зындæрæй цæуынц, æмæ хъæуы, цæмæй дохтыртæ афойнадыл райдайой сывæллæтты дзæбæх кæнын».
Ацы къуыри фыццаг хатт рабæрæг грипп А (H1N1)-ы хуыз. Фæлхасадмæ цæстдарды управленийы куыд зæгъынц, афтæмæй низы ацы хуыз арæхдæр сывæллæттæм вæййы.
Ахуырадон процесс æрлæууын кодтой 9 скъолайы æмæ 129 къласы. Æхгæд æрцыдысты сывæллæтты 35 рæвдауæндоны æмæ 37 къорды. Рынчынты нымæц фæфылдæр хистæрты хсæн дæр. Специалисттæ куыд зæгъынц, афтæмæй ахсджиаг у, афоныл медицинон æххуыс бацагурын æмæ сбæрæг кæнын вирусы хуыз.
Дзæгъиаты Зæринæ, Дзæуджыхъæуы 7-æм поликлиникæйы терапевт: «Ныртæккæ вакцинаци кæнын хъæуы короновирусы æмæ гриппы тыххæй. Вакцинаци куы скæнынц, уæд къаддæр рынчын кæнынц, æнцондæрæй цæуы низ. Ис пациенттæ, æндæр низтæ кæмæ ис, æмæ уыцы низтæ цæмæй ма фæуæззаудæр уой».
Æмтгæй райсгæйæ, республикæйы рынчынты нымæц 25 проценты фæфылдæр. Специалистты амындмæ гæсгæ, хъæуы æхæхст кæнын санитарон нормæтæ, сывæллæттимæ ма цæуын, бирæ адæм кæм ис, ахæм бынæттæм.
