Экскурси сын скодтой музейыл, равдыстой сын интерактивон кълæстæ, стæй стыр æмæ хæздыг библиотекæ
Республикæйы фысджыты Цæдисы минæвæрттæ фембæлдысты Цæгат Кавказы суворовон æфсæддон училищæйы курсанттимæ. Ахуыргæнæндоны уазджытæ уыдысты Цæгат Ирыстоны адæмон поэт Дзасохты Музафер, фысджыты Цæдисы сæрдар Агънаты Гæстæн, историк, Хуссар Ирыстоны фыццаг президент Цыбырты Людвиг æмæ цыппар хатты дунейы чемпионкæ боксæй Дудиаты Фатимæ. Экскурси сын скодтой музейыл, равдыстой сын интерактивон кълæстæ, стæй стыр æмæ хæздыг библиотекæ. Фыдыбæстæйы Стыр хæсты уæлахизы 76 азы агъоммæ фысджытæ рæзгæ фæлтæрæн радзырдтой райгуырæн бæстæйы сæраппонд чи тох кодта, уыцы поэтты тыххæй, бакастысты сын æмдзæвгæтæ. Суворовон училищæйы уазджытæм баззади æхсызгон æнкъарæнтæ, фæсивæдæн сæ зæрдæ загъта Уæрæсейæн аккаг фæдонтæ куыд суой, уый.
