Мадзал баст уыд Сталинграды тохы уæлахизы бонимæ
Дзæуджыхъæу – Волгоград æфсæддон намысы æмæ хæлардзинады бастдзинад. Республикæйы хæлардзинады Хæдзары арæзт æрцыд Волгограды делегациимæ фембæлд. Мадзал баст уыд Сталинграды тохы уæлахизы бонимæ. Уазджытæ цалдæр боны сты Цæгат Ирыстоны. Уыцы мгъуыдмæ бабæрæг кодтой Намысы Мемориал æмæ ма Фыдыбæстæйы Стыр хæсты æндæр цыртдзæвæнтæ æмæ зæрдылдарæн бынæттæ. Сæвæрдтой сыл дидинджытæ. Фембæлдысты Дзæуджыхъæуы администрацийы сæргълæууæг Фæрниаты Тамерланимæ. Хæххон паддзазадон аграрон университеты та аныхас кодтой, нæ бæстæйы адæм фашистты ныхмæ тохы цы хъæбатырдзинад равдыстой, уый тыххæй. Цæгат Ирыстоны æмæ Волгограды хæлардзинады хæдзары директортæ Кочиты Георгий æмæ Фæрниаты Хъазыбег, стæй делегацийы иннæ уæнгтæ, национ-культурон æхсæнадты сæрдартæ радзырдтой кæрæдзийы фæлтæрддзинады тыххæй, стæй Стыр Уæлахизы 75 азы бонмæ сæхи куыд цæттæ кæнынц, уый дæр. Фысымтæ æмæ уазджытæ ма кæрæдзийæн ракодтой зæрдылдарæн лæвæрттæ. Фæбæрæг ма кæндзыстæм уый дæр, æмæ Сталинград фашисттæй суæгъд кæныныл тохы архайдта 5 мин адæймаджы Цæгат Ирыстонæй.
