Баст уыд Мæскуыйы бынмæ тохимæ
Республикæйы хæлардзинады Хæдзары арæзт æрцыд зæрдыл дарыны урок «Великое сражение великой страны». Баст уыд Мæскуыйы бынмæ тохимæ. Уыцы историон цау фæци 80 азы размæ. Уæвгæ та Мæскуы суæгъд кæнынæй бындур æвæрд æрцыд, Стыр Уæлахиз чи рхаста, уыцы тохтæн. Зæрдылдарæн урок иунæг нæу, фæлæ æнæхъæн цикл. Уæлахизы Боны агъоммæ арæзт цæуынц алыхуызон патриотон мадзæлттæ. Уыдоны фæрцы скъоладзаутæ базонынц бирæ ног историон цауты тыххæй. Зæгъæм, ацы хатт сын радзырдтой 1941-æм азы 5-æм декабрæй – 1942-м азы 20-æм апрельмæ цы тох цыди, уый тыххæй. Кæстæртæ ма бакастысты хæстон кинохроникæйы кадртæм, æфсæддон быцæуы тыххæй кинонывмæ. Базыдтой сырхæфсæддонты, денджызонты, партизанты, стæй фронты фæсчъылдымы фæллойгæнджыты тыххæй цымыдисаг хабæрттæ. Се ппæт дæр архайдтой Мæскуыйы бынмæ немыцаг фашистты æфсæдтæ скуынæг кæныныл. Патриотон мадзалы архайджытæ, минут æдзæмæй алæугæйæ, æрымысыдысты Фыдыбæстæйы Стыр хæсты æдзард хæстонты рухс нæмттæ.
