Пайда хъуыддаг у, уымæн æмæ низы ныхмæ прививкæ скæныны тыххæй адæмы поликлиникæмæ цæуын нал хъæудзæн
Республикæйы йæ куыст дарддæр кæны вакцинацийы мобилон пункт. Пайда хъуыддаг у, уымæн æмæ низы ныхмæ прививкæ скæныны тыххæй адæмы поликлиникæмæ цæуын нал хъæудзæн. Вакцинæ райсæн ис суанг дæ хæдзары кæрты дæр. Куыд кусы ахæм системæ, уый федта нæ уацхæссæг Томайты Батраз, æмæ йын бакæсæм йæ сюжетмæ.
Æмæ адæм, уæвгæ дæр цæуынц. Дæнцæгæн æрхæсдзыстæм Хуырымты Тамарæйы. Коронавирусæй рынчын уыди фарон, мартъийы. Ныр та тæрсы, ногæй йыл ацы хæцгæ низ куы бахæца, уымæй. Уымæ гæсгæ сфæнд кодта ковиды ныхмæ прививкæ скæнын. Æвæстиатæй æрбацыд дохтырмæ, æмæ скодта медицинон æркаст.
Ковиды миниуджытæ йæхиуыл бавзæрста Тамарæйы сыхаг Кокайты Еленæ дæр. Коронавирусы ныхмæ прививкæ скæнынмæ æрыгон чызг йæ ныфс нæ хаста. Баххуыс ын кодтой специалспециалистты амынддзинæдтæ.
Дзæуджыхъæуы фыццæгæм поликлиникæйы вакцинацийы цæугæ пункт, зæгъæн ис, æмæ алы бон дæр æрзилы, йæ бæрны цы участоктæ ис, уыдоныл. Медицинон кусджыты хъуыдымæ гæсгæ, стационарон кабинетæй ницæмæй хицæн кæны.
Коронавирусы пандемияимæ уавæр нæ республикæйы бонæй-бонмæ кæны æвзæрдæр. Медиктæ зæгъынц, коллективон иммунитет у æвдадзы хос. Æндæр ныхæстæй дзургæйæ – æдас æмæ æнæниз цардмæ фæндаг. «Спутник V»-йы дыккаг компонентæй прививкæ пациенттæн кæнынц ам, мобилон пункты. Афтæмæй вакцинаци скæнæн ис, хæдзарæй нæ рацæугæйæ. Уымæй та дæхи æмæ дæ бинонты æдасдзинад бахъахъхъæнын.
