Регионы цæрджытæм æмæ уазджытæм сидынц лæмбынæгдæр уæвынмæ
Цæгат Ирыстоны ракодта тæвд бонтæ. Республикæйы кæцыдæр районты уæлдæфы температурæ хæццæ кæндзæн хъармы 40 градусы онг. Регионы цæрджытæм æмæ уазджытæм сидынц лæмбынæгдæр уæвынмæ. Специалисттæ амонынц, тæвд бонты нæ хъæуы бирæ рæстæг хурмæ уæвын, рог уæлæдарæс æмæ сæрылгæнæн дарын, дон нуазын ма рох кæнын æмæ буар хурæй хъахъхъæнæн кремæй сæрдын. Бæлвырддæр радзурдзæн Хъайтмазты Дзерассæ.
Дзæуджыхъæуы сæрмæ къæвдайы мигътæ куыддæр апырх сты, афтæ ралæууыдысты сæрдыгон тæвд бонтæ. Адæмы хурæй хъæуы хи бахъахъхъæнын. Æмæ цалынмæ сывæллæттæ сæхи бассейнты ирхæфсынц, уæдмæ хистæртæ агурынц аууон бынæттæ.
Фæлæ ахæм тæвд бонты уынджы уæвгæйæ, ахсджиаг у æдасдзинады æгъдæуттæ зæрдыл дарын, цæмæй адæймаг хуры тых йæхиуыл ма банкъара. Буары бæрзонд температурæ, хæцъæфты лæмæгъдзинад, арæх зæрдæцавд. Уыдон сты тæвдон цæфы æууæлтæ. Цæмæй уый ма æрцæуа, уый тыххæй дохтыртæ дæттынц хуымæтæг амынддзинæдтæ.
Абон июлы тæвд бонтæн фæразын æнцондæр у. Фылдæр хæдзæртты ис кондиционертæ кæнæ вентилятортæ. Раздæр адæмæн ахæм гæнæнтæ нæ уыдис. Фæлæ уæддæр агуырдтой тæвд рæстæджы ныхмæ мадзæлттæ. Астæуккаг Азийы цæрджытæ, сæрмагондæй Таджикистаны, сæхи тыхтой даргъ бæмбæдджын халатты. Уыдон тæвд æвзæр уадзынц.
Ахæм халат тæвд бонты уæлæ кæныны традици ныр дæр ис. Куыд, тæвд æмæ æнæмæнг кæрдæгхуыз цай цымыны традици дæр. Уый æрмæст дойны нæ сæтты, фæлæ ма уæрæхдæр кæны тугдадзинтæ. Уый фæрцы организм тагъддæр дæтты тæвд æмæ уазалдæр кæны.
Ацы хатт республикæйы боны ахастыл тынг ахады уæрæх антициклон, зæгъынц синоптиктæ. Ис Цæгат Кавказы районты сæрмæ. Тæвд рæстæг нырма ахæсдзæн. Уазæлттæм æнхъæлмæ кæсгæйæ та, æнæмæнг зæрдыл дарын хъæуы хуры бын уæвыны æгъдæуттæ.
