Раздæр центр кæм уыд, уыцы авдуæладзыгон бæстыхайы та сæвæрдтой 460 инфекцион æмæ 42 реанимацион бынаты
Республикæйы клиникон рынчындон ногæй исын райдыдта коронавирусæй рынчын пациентты. Уый тыххæй рацарæзтой тугдадзинты регионалон центр. Уый йæ куыст адарддæр кæндзæн хицæн дыууæуæладзыгон корпусы рынчынты исæн хайады. Раздæр центр кæм уыд, уыцы авдуæладзыгон бæстыхайы та сæвæрдтой 460 инфекцион æмæ 42 реанимацион бынаты. 4 бонмæ стационармæ баластой 194 пациенты. Уыдонæй 40 сты реанимацийы, рæуджытæ кусынгæнæн аппаратты фæрцы улæфынц 13 адæймаджы. Æппæт æмбæлгæ кусæнгæрзтæй рынчындон у æххæст. Уæдæ цух не ййафынц медикаменттæй дæр. Дохтыртæм фæлтæрддзинад ис. Уæ зæрдыл уын æрлæууын кæндзыстæм, коронавирусæй рынчынты истой низы фыццаг æмæ дыккаг уылæны дæр. Специалистты ныхæстæм гæсгæ, æвæстиаты æмæ нысанон медицинон æххуыс нæ республикæйы цæрджытæ исынц æххæстæй.
Республикæйы клиникон рынчындоны ма хъуамæ фæзына донгъæд туаггуыр ласынæн цистернæ. Иу резервуары аргъ у – 19 милуан сомы. Ныртæккæ территорийы цæуынц цалцæггæнæн куыстытæ. Æвæрынц дзы уæлмхасæн боцкъатæ туаггуыр дарынæн, æмæ йын йæ запастæ фæфылдæр кæнынæн.
