Ацы хъуыддаг къухы бафтыд бæрзондтехнологон кусæнгæрзты фæрцы
Республикæйы клиникон рынчындоны æнтыстджынæй кæнынц эндоскопион операцитæ. Ацы хъуыддаг къухы бафтыд бæрзондтехнологон кусæнгæрзты фæрцы. Ахæм технологийы руаджы дохтыртæ исынц фылдæр информаци, реабилитаци та ацæуы тагъддæр. Бæлвырддæр радзурдзæн Хъайтмазты Дзерассæ.
Олисаты Олесяйæн фыццæгтæй иуæн скодтой операци эндоскопион методикæмæ гæсгæ. Сылгоймаг республикон клиникон рынчындоны хайадмæ къуыри размæ бахауд тыхджын тугцыдимæ. Рабæрæг æм миома. Операцийæ 2 сахаты куы рацыд, уæд Олеся йæ къæхтыл слæууыд. Йæхи хорз æнкъардта.
Бæрзондтехнологон кусæнгрæзтæй ахадгæйæ пайда кæнынц. 2 сантиметрæй чысыл фылдæр лыгы уылты ныртæккæ дохтыртæ исынц къуыллау. Дудгæ уæфт нерв æлхъывдта æмæ-иу уымæй пациенткæмæ сæвзæрд тынг рыст. Дохтыртæ сæ алы азмæлдмæ дæр лæмбынæг кæсынц экраныл.
Ахæм операци скæнын бантыст ног эндоскопион цæджындзы руаджы. Кусæнгарзы аргъ у цалдæр дæс милуан сомы. Раздæр хирургийы кодтой стыр лыг. Ныр та чысыл, æмæ уый фæрцы рæстæгимæ рынчынтæн нос дæр нал баззайдзæн.
Республикон клиникон рынчындоны хирургон хайад ма æнхъæлмæ кæсы иу ногдзинадмæ. Рынчындон райста лицензи оргæнты трансплантацийæн. Фыццаг ахæм операцитæ дохтыртæ фæнд кæнынц ацы аз скæнын.
