Ахæм уынаффæ рахаста Битарты Вячеслав рынчындæтты сæйраг дохтыртимæ радон видеоконференцийы
Республикæйы клиникон рынчындоны тагъд рæстæг равæрдзысты дыууæ сæдæ сынтæджы коронавирусæй рынчын адæмæн – ахæм уынаффæ рахаста Битарты Вячеслав рынчындæтты сæйраг дохтыртимæ радон видеоконференцийы.
Уымæй уæлдай сбæрæг кæндзысты, медицинон куыстуæтты бæрны цы реанимацион ифтонггарз ис, уый, æмæ дзы цы нæ фаг кæна, уыдон балхæндзысты æвæстиатæй. Республикæйы разамонæг куыд загъта, афтæмæй курдиат бахæсдзæнис Уæрæсейы промышленносты министрадмæ, цæмæй нæ республикæйæн радих кæной рæуджыты вентиляцийы æхсæрдæс ног аппараты. Уымæй уæлдай æмбырды фехъусын кодтой, нæ республикæйæ рацæуæг амалхъом адæм Цæгат Ирыстоны рынчындæттæн дæс нырыккон аппараты кæй балхæдтой, уый тыххæй. Битарты Вячеслав куыд загъта, афтæмæй ныртæккæ сæйраг нысан у, республикæйы клиникон рынчындоны фæндзай бынаты кæм уыдзæнис, ахæм реанимацион хайад саразыны хъуыддаг.
