Фæсивæд æм сæхи зæрдиагæй цæттæ кодтой
Республикæйы культурæйы колледжы арæзт æрцыд ацы азы рауагъдонты дзуапдæттæн концерт. Фæсивæд æм сæхи зæрдиагæй цæттæ кодтой. Куыд рауад се сфæлдыстадон фæлварæн, уый тыххæй радзурдзæн Тъехты Элинæ.
Цалынмæ инструменталон ансамбль цæгъды, уæдмæ республикæйы культурæйы колледжы артисттæ сæхи цæттæ кæнынц, сæ дæсныйад кæм хъуамæ равдисой, уыцы концертмæ. Сценикон уæлæдарæсы элементтæ сыл хъуамæ бадой итæг хорз. Алы студент дæр архайы цалдæр кафты. Кæд зын у, уæддæр сын кафты руаджы фадат вæййы сæ курдиат равдисынæн. Хъалæгаты Альбертæн ацы бон тынг ахсджиаг у. Йæхи хорз куы равдиса, уæд ын фадат уыдзæн Мариинаг театры филиалы Суанты Валерийы труппæйы бацархайын. Альберты ма фæнды йæ ахуыр адарддæр кæнын Мæскуыйы профилон уæлдæр ахуыргæнæндоны.
Хъалæгаты Альберт, Республикæйы культурæйы колледжы рауагъдон: «Мæ цард гыццылæн нырмæ сбастон кафтимæ æмæ дарддæр дæр фæнд кæнын уыцы фæндагыл цæуын. Мæ бон цас уа, уый бæрц кафдзынæн. Мæ ахуыр куы фæуон, уæд, Хуыцауы фæндæй, уæлдæр ахуырадмæ бацæудзынæн. Фæнды мæ мæхи бафæлварын Мæскуыйы, Налцыккы, кæнæ Краснодары.»
Тамбиты Камилла ахуыр кæны 3-æм курсы. Куыд зæгъы, афтæмæй кафын уарзы. Сценæмæ алы рацыд дæр ын хæссы удæнцойдзинад. Дзуапдæттæн концертмæ бирæ фæцæттæ кодтой.
Тамбиты Камилла, Республикæйы культурæйы колледжы 3-æм курсы студенткæ: «Гыццылæй мæ мæ мад радта кафджытæм, æмæ йæ зыдтон, дарддæр мæ царды фæндаг кафтимæ сбæтдзынæн, уый. Мæ хъуыдыйы никуы уыдис медицинæмæ, кæнæ æндæр искуыдæм бацæуын. Абон нæ программæйы уыдзысты ирон, гуырдзиаг кæфтытæ æмæ бирæ ног постановкæтæ.»
Æвдыстой нырыккон постановкæтæ, азербайджанаг кафт агуывзæтимæ, убыхаг æмæ Кавказы æндæр нациты кæфтытæ. Сæ ныв æмæ драматургийыл куыстой ахуыры азы дæргъы.
Дзуапдæттæн концерт ахсджиаг у æрмæст колледжы рауагъдонтæн нæ, фæлæ ма сæ ахуыргæнджытæн дæр. Туаты Дианæ у рауагъдон курсы разамонæг. Ансамбльимæ бацæттæ кодта 10 равдыстæй фылдæр. Уымæй уæлдай ма æвдисдзысты Паддзахадон ансамбльтæ «Кабардинка» æмæ «Ставрополье»-йы разамонджытæ цы номыртæ бацæттæ кодтой, уыдон дæр. Концерты уыдысты кадджын уазджытæ.
Цехъойты Ларисæ, Республикæйы культурæйы колледжы директор: » Абон махмæ чи рбацыд,уыдонæн зæгъæм бузныг. Нæ сывæллæтты дипломты фыст ис кафджыты къордты кæй ахуыр кæндзысты, уый.
Ахуыры азы кæрон хатдзæгтæ скæнынц аивæдты колледжы æппæт хайадтæ. Се нтыстдзинæдтæ равдыстой театралон хайады студенттæ, июны кæрон та Уырыссаг театры сценæйы кæронбæттæн хатдзæгтæ равдисдзæн адæмон инструментты оркестр.
