Уый йæ дуæрттæ байгом кодта физикон-математикон лицейы
Республикæйы ма фæзынд ноджыдæр иу, æнæпилотон авиацион системæтæ кæм ахуыр кæндзысты, ахæм хъæугæ æрмæгæй ифтонг кълас. Уый йæ дуæрттæ байгом кодта физикон-математикон лицейы. Кълас дзуапп дæтты æппæт нырыккон домæнтæн. Йæ фарсмæ ис, æнæпилотон аппараттæ кæцæй стæхдзысты, ахæм бынат. Ахуырдзаутæн дронтимæ архайын амондзысты Кванториумы рауагъдонтæ. Уым 5 азы дæргъы кусы «Аэроквантум». Бæлвырддæр хабæрттæ радзурдзæн Чехойты Фатимæ.
Цæгат Ирыстонæн дихгонд æрцыд 298 милуан сомы аргъ федералон грант. Уый фæрцы республикæйы кусын райдайдзысты æнæпилотон авиацион системæтæ кæм ахуыр кæндзысты, ахæм кълæстæ. Ныр физикон-математикон лицей-интернаты ахуырдзаутæн дæр фадат ис дронтимæ кусынæн.
Æнæпилотон авиацион системæты кълас ахуыргæнæндоны байгом федералон проектмæ гæсгæ. Республикæйы ахуырад æмæ наукæйы министры хæдивæджы ныхæстæм гæсгæ, физикон-математикон лицейы ахуырады бындур сты ног технологитæ. Уымæ гæсгæ æнæпилотон авиацион системæтимæ сывæллæттæ зонгæ сты.
Ног къласы ис 12 æнæпилотон тæхæг аппараты, 3D-принтер æмæ ахуыртæн æндæр хъæугæ æрмæг. Йæ фарсмæ йын скодтой, дронтæ-иу уæлдæфмæ кæм стæхын кæндзысты, ахæм бынат дæр.
Лицейы цы Кванториум ис, уым 5 азы дæргъы кусы «Аэроквантум». Уым скъоладзаутæн дæттынц æнæпилотон авиацион системæты программæмæ хæстæг зонындзинæдтæ. Йæ рауагъдонтæ «Æнæпилотон авиацийæн кусджытæ цæттæ кæныны» проектмæ гæсгæ цæуынц скъолатæм ахуыргæнджытæй кусынмæ.
Созайты Зауыр у Кванториумы «Аэроквантумы» рауагъдон. Ныр йæхæдæг зæрдиагæй кусы лицейы æнæпилотон авиацион системæты ахуыргæнæнæгæй.
Æнæпилотон авиацион системæйы программæмæ гæсгæ ацы ахуыры аз хъуамæ зонындзинæдтæ райсой 950 скъоладзауы. Сывæллæттæ зæрдиагæй архайынц. Национ проекты архайынц республикæйы 18 скъолайы. Специалисттæ зæрдæ дарынц, уый руаджы Цæгат Ирыстоны ног инженертæ кæй фæзындзæн, ууыл.
Хорз материалон бындур, фæлтæрдджын ахуыргæнджытæ æмæ зонындзинæдтæ исынмæ цæттæ скъоладзаутæ сты профессионалон æнтыстдзинады æртæ иуæджы. Лицей уыдонæй у æххæст.
