Шофыртæ зæгъынц, ахæм фæткимæ алы бон машинæйæн арендæ фидын стæй ма бинонтæ дарын нæ бантысдзæн
Республикæйы цæрджытæ цин кæнынц, маршрутон такситы автопарк кæй ног кæнынц, ууыл. Фæлæ уый хыгъд, ууыл тынг нæ барадысты шофыртæ сæхæдæг. Иуырдыгæй сын фадат ис официалон æгъдауæй куысты ныллæууынæн, иннæмæй та сын ис бæлвырд куысты фæтк. Шофыртæ зæгъынц, ахæм фæткимæ алы бон машинæйæн арендæ фидын стæй ма бинонтæ дарын нæ бантысдзæн. Бæлццæттæ та арæх хъаст кæнынц, æрлæууæн бынæтты бирæ рæстæг кæй фæлæууынц, уымæй. Куыд алыг кæнæн ис фарста, уый тыххæй радзурдзæн нæ уацхæссæг Бокоты Виктория.
Социалон хызты цы видеоæрмæг апарахат, уым дыууын фыццæгæм номыры маршрутон такситы фæндзай шофыры карзæй ныхас кæнынц, æнæнхъæлæджы цы уавæры бахаудысты, уый фæдыл. Сæ компанийы разамонæг линимæ ракодта ног машинæтæ. Уымæ гæсгæ шофыртæ сæхи хæдтулгæтимæ хъуамæ маршрутæй ацæуой.
Не сфæлдыстадон къордæн видеокамерæмæ адæмимæ аныхас кæнын нæ бантыст. Уымæн æмæ йæ нæ зонынц, се ргом ныхас цæмæ расайдзæн, уый. Фæлæ сæ цы фарста тыхсын кæны, уый тыххæй нын радзырдтой. 50 шофыры баззайдзысты æнæ куыстæй. Кæмæндæрты фадат радтой, зæгъгæ фирмæйы ног машинæмæ рахиз. Фæлæ ног уавæрты кусгæйæ сæ бон нæ уыдзæн сæ бинонты дарын. Цæмæй алы бон дæр машинæйы арендæйæн фидай æмæ ма уымæй уæлдай исты бакусай – уый тыххæй хъæудзæн дывæр хъарутæй кусын. Уый та халдзæн фæллойадон кодекс. Ивгъуыд къуырийы кæрон маршрутмæ рацыд цалдæр машинæйы.
Транспортон компанийы минæвар Рустам Гамидов куыд радзырдта, афтæмæй рæстæгæй-рæстæгмæ бæлццæттæй иста хъæстытæ, ома маршрутон такситæ нæ фаг кæнынц, стæй ма машинæты уавæр дæр арæх вæййы хуыздæрхъуаг. Уымæ гæсгæ рахастой уынаффæ 10 ног машинæ «Газель Некст» балхæныны тыххæй. Уыдон дзуапп дæттынц нырыккон домæнтæн. Шофыртæн зæрдæ бавæрдтой, официалон æгъдауæй сæ куысты кæй слæууын кæндзысты æмæ сын кæй уыдзæн бæлвырд куысты фæтк.
Уыимæ ног машинæтæ фенын дæр не сфæлдыстадон къордæн нæ бантыст. Фæлæ фирмæйы разамонæджы ныхæстæм гæсгæ, маршрутон такситæ хъуамæ линимæ рацыдаиккой фæлладуадзæн бонты.
Хæстæгдæр бонты бæрæг уыдзæн – ног машинæтæ фаг сты æппæт бæлццæттæн, æви нæ, уый. Æмæ уæд рахæсдзысты уынаффæ, маршрутæй кæй систой, уыцы шофырты фæстæмæ здахын бахъæудзæн, æви нæ, уый дæр.
