Кировы районы администрацийы ацыди, регионалон проект царды уадзыны фыццаг къæпхæн
Республикæйы мин цæрæгæй фылдæр, мæгуырдзинадимæ тохы программæ æххæстгæнгæйæ, райсдзысты паддзахадон æххуыс. 250 мин сомыл сæ зæрдæ дарын у, фæкæсынхъуаг адæмы номхыгъдмæ чи хауы, æмæ йæ царды уавæртæ фæхуыздæр кæнын кæй фæнды, уыдонæн. Фадат сын ис хи хъуыддаг байгом кæнынæн. Кировы районы ацыди радон æвзарæн къæпхæн. Уырдыгæй Касаты Наирæйы æрмæг.
Гæбуаты Юрий цалдæр азы парахат кæны уæрццытæ. Йæ хæдзарады ис мин æмæ 500 уæрццы. Ацы аз Елхоты цæрæг сси мæгуырдзинады ныхмæ тохы регионалон программæйы архайæг. Йæ фæлгæты ис фæкæсынхъуаг адæмæн баххуыс кæныны мадзæлттæ. Юриимæ ныридæгæн бафыстой бадзырд 250 мин сомæн. Уыцы фæрæзтæй Юрий нысан кæны йæ хæдзарад фæуæрæхдæр кæнын. Йæ ныхæстæм гæсгæ йын программæйы архайыны фадат ратдзæни йæ хъуыдытæ сæххæст кæнынæн. Бæлвырддæр та – уæрццытæн инкубатор скæнын.
Юрийы ныхæстæм гæсгæ, алы бизнесы дæр сæйраг у рекламæ. Социалон хызтæ алы продукцийæн дæр кæнынц рекламæ. Фермер парахат кæны æйчытæ дæр. Уымæй уæлдай дзы уæрццы дзидза исынц хæстæгдæр республикæтæ дæр.
Кировы районы администрацийы ацыди, регионалон проект царды уадзыны фыццаг къæпхæн. Кусæг къамис равзæрста кандидатты, аргъ сын скодта сæ бизнес проекттæн. Социалон контрактæй спайда кæныны программæйы архайы 50 адæймагмæ хæстæг. Ис дзы 4 къæпхæны. Се хсæн хи амалхъомдзинад, адæймаг хи æфтиæгтæй куыстхъом кæй у, ахæм статусы регистраци, хи хæдзарады æмæ материалон æххуыс.
Цæгат Ирыстоны афæдзы райдианæй бафыстой 100 контрактæй фылдæр. Æдæппæтæй фæнд кæнынц мин адæймагæн баххуыс кæнын. Уыцы хъуыддæгтæн федералон æмæ республикон бюджеттæй дихгонд æрцыди 151 милуан сомы. Паддзахадон социалон æххуыс баст у мæгуырдзинадимæ тох кæнынимæ. Ис ын ахадындзинад. Фæлварæн проект Цæгат Ирыстоны республикæйы сæргълæууæг Битарты Вячеславы хъæппæрисæй æххæстгонд æрцыди 2019-æм азы.
