Ахæм хæзнаты нымæц дзы хæццæ кæны 30 мины онг
Рагон, стæм хатт уагъд чиныг йæхимæ домы уæлдай цæстæнгас. Республикæйы национ наукон чиныгдоны кусджыты руаджы уыдон хъахъхъæд цæуынц цæстыгагуыйау. Ахæм хæзнаты нымæц дзы хæццæ кæны 30 мины онг. Стæм уагъд чиныджы хайады куысты тыххæй бæлвырддæр радзурдзæн Чехойты Фатимæ.
Ам ирд æддаг цъар æмæ æнаипп сæргондтæ нæ фендзынæ. Ацы чингуытæ æнæ уыдонæй сæхимæ *лвасынц адæймаджы цæстæнгас. Уникалон экземпляртæ хъахъхъæд цæуынц, æдзух уæлдæфы температурæ18 градусæй 20 градусы онг хъарм кæм вæййы, ахæм агъуысты. Рæстæджы цыдимæ сæ бынтон тынг чи ныззæронд, уыдон сæвæрынц хицæн къоппыты, сæрмагонд æрмæгæй тыхтæй. Ацы хайады кусджытæ чингуытæ хъахъхъæнынц цæстыгагуыйау. Æвналынц сæм æрмæстддæр æрмкъухты – алкæцыдæр сæ у уырыссаг æмæ дунеон литературæйы бынты стыр хæзна.
Ахæм стæм чингуытæ ам ис 30 минæй фылдæр. Ацы хæзнатæй алкæцыйæн дæр ис йæхи истори. Иу сæ кæны, революцийы агъоммæ фыст кæй æрцыдысты, уый.
Ахсджиаг у чингуытæн æрмæст сæ бакаст бахъхъæнын нæ. Сæйрагдæр у сæ мидис. Цæмæй ног фæлтæртæ зоной истори, уый тыххæй библиотекæйы цæуы æрмæг нымæцон хуызмæ раивыныл куыст.
Электрон æвæрæнты хайады фæлтæрдджын специалист Александр Мезенцев арæхстгай архайы зæронд чингуытимæ – кæны сын нымæцон къопитæ, цæмæй алы адæймагæн дæр фадат уа æнусон традицитимæ зонгæ кынын, ивгъуыды улæфт банкъарын.
Алесандр Мезенцевы ныхæстæм гæсгæ, 8 азмæ йæ къухтæм бахаудысты алыхуызон рагон чингуытæ. Ахæм æрмæг домы сæрмагонд ахаст – хиуыл хæцгæйæ арæхстгай *внæлд. Рагон мыхуыр бынтон æнцон нæу электрон хуызмæ раивын.
Куыд фæнды зын куы уа рагон æрмæг хъахъхъæнын, уæддæр уыцы куыст иу уысм дæр не *рлæууы, цæмæй аргъ кæмæн нæй, уыцы культурон бынтæй пайда кæныны фадат уа ныры æмæ фидæны фæлтæртæн.
