28 декабря 2022, 11:46
Республикæйы нывгæнджыты цæдисы равдыстадон залы байгом аивадон равдыст-конкурс «Вернисаж года 2022»
Æдæппæтæй экспозицийы ис 200 куысты алы жанрты
Республикæйы нывгæнджыты цæдисы равдыстадон залы байгом æрвылазон аивадон равдыст-конкурс «Вернисаж года 2022». Уый у Цæгат Ирыстоны нывгæнджыты кæронбæттæн равдыст, æмæ дзы хынцынц афæдзы бæрæггæнæнтæ. Равæрдтой дзы æвдай авторы куыстытæ, уыдонимæ куыд зындгонд нывгæнджыты, афтæ курдиатджын фæсивæды куыстытæ. Æдæппæтæй экспозицийы ис 200 куысты алы жанрты, уыдонимæ ахорæнтæй конд нывтæ, графикæ, скульптурæ, декоративон аивад, куклатæ æмæ афтæ дарддæр. Равдыст Вернисаж года цалдæр азы дæргъы аразынц конкурсы хуызы. Йæ бæрæггæнæнтæм гæсгæ январы кæрон хæдбар жюри сбæрæг кæны хуыздæр куыстытæ цыппар номинацимæ гæсгæ. Уæлахиздзаутæн ратдзысты дипломтæ æмæ æхцайы призтæ.
