Ацы хатт медиктæ æркаст скодтой Дыгуры районы цæрджытæн
Рагагъоммæ раиртасын, цæмæй уый фæстæ дзæбæх кæнын ма бахъæуа, уый тыххæй. Республикæйы онкодиспансеры дохтыртæ ногæй райдыдтой районты поликлиникæтæ бæрæг кæнын. Профилактикон куыст цæуы, акци «Онкодесант» æххæст кæнгæйæ. Ацы хатт медиктæ æркаст скодтой Дыгуры районы цæрджытæн. Бæлвырддæр радзурдзæн Фидараты Маринæ.
Кæд бирæ рæстæг исты рыстытæ æнкъарыс, уæд, æнæмæнг, хъуамæ бацæуай дохтырмæ, зæгъынц онкологтæ. Чи зоны æмæ миниуджытæ æвæстиатæй нæ рабæрæг уыдзысты, фæлæ ацы хъуыддаджы къæрцхъус уæвын у æнæмæнг хъуыддаг. Профилон республикон диспансеры дохтыртæ, проект «Онкодесант» æххæстгæнæгæйæ бæрæг кæнынц районты поликлиникæтæ. Пандемияйы уавæртæ куы айстой, уæдæй фæстæмæ дыууæ азмæ ахæм куыст арæзт æрцыд фыццаг хатт.
Дерматолог, гинеколог, маммолог, уролог æмæ хирург. Дохтыртæ канд æркаст нæ кæнынц, фæлæ ма куы бахъæуа, уæд пациентты арвитынц республикæйы медицинон куыстуæттæм, уæлæмхасæн иртæстытæ скæнынмæ.
Уымæй дарддæр, медиктæ бæрæг кæнынц, онкологон низтæй рынчын чи у, уыдон æмбæлгæ препараттæй куыд ифтонг сты, уымæ. Стæй ма сæ бон у, хыгъды чи ис, уыцы пациентты дзæбæхгæнæн мадзæлттæм ивддзинæдтæ бахæссын. Хосроты Руслан уыцы-иу рæстæг кусы онкологон диспансеры æмæ Дыгуры районы центрон рынчындоны дæр. Бирæты рынчынты зоны лæгæй-лæгмæ.
Профилактикæ – у æппæтæй хуыздæр мадзал, зæгъынц пациенттæ сæхæдæг дæр.
Диагностикæ – сæйраг æххуысгæнæг, низ рагагъоммæ базоныны хъуыддаджы. Уымæ гæсгæ ахæм мадзæлттæ сты æнæмæнг хъæугæ, – зæгъынц онкологон диспансеры специалисттæ. Иу бонмæ Дыгуры районы æркаст скодтой 70 пациентæн. Уæлдай æргом аздæхтой сылгоймæгтæм. Кæд дæ ницы тыхсын кæны, уæд скрининг кæнын хъæуы афæдз иу хатт.
Уый скæныны фадат ис, диспансеризацийы процедурæ кæнгæйæ.
