Уый у традицион мадзал, æмæ фыццаг хатт нæ ацыд
Республикæйы онкологон диспансеры арæзт æрцыд гом дуæртты бон. Уыцы хъæппæрис разынд Челæхсаты Оксанæмæ. Уый у традицион мадзал, æмæ фыццаг хатт нæ ацыд. Ацы аз Цæгат Ирыстонмæ ссыдысты Мæскуыйы раззагдæр специалисттæ – онкогинеколог, онкоуролог, онколог-маммолог, химиотерапевт, торакалон æмæ абдоминалон хирург, репродуктолог æмæ гематолог. Консультаци райсыны фадат уыд алкæмæн дæр, æрмæст рагагъоммæ хи ныффысгæйæ. Сæ фылдæр уыдысты, ныридæгæн диагноз кæмæн сæвæрдтой, ахæм адæм. Специалисттæ куыд зæгъынц, афтæмæй диагностикæ рагацау скæнгæйæ, низ сдзæбæх кæнынæн фылдæр гæнæнтæ ис. Онкодесанты иу боны куыстмæ бантыст 600 адæймагмæ æркæсын. Уымæй дарддæр ма равзæрстой пациентты, дарддæр сæ Мæскуыйы клиникæты дзæбæх кæнынæн. Акци саразыныл бакуыстой онкологон пациентты Ассоциацийы регионалон хайад «Здравствуй», хæрзаудæн фонд «Герои» æмæ æнæкоммерцион организаци «Инфосоцпроект». Баххуыс сын кодта республикæйы æнæниздзинадхъахъхъæнынады министрад.
