Скъоладзаутæ æрмæст теоретикон зонындзинæдтæ нæ райсынц, саразынц ма сын практикон ахуыртæ университеты ахуыргæнджыты разамындæй
Скъладзауты аграрон къабазы дæсныйæдтæм куыд сцымыдисгæнæн ис, цæмæй ма лабороторон куыстыты дæр зæрдиагæй архайой? Республикæйы парахатдæр кæнынц аграрон кълæстæ. Скъоладзаутæ æрмæст теоретикон зонындзинæдтæ нæ райсынц, саразынц ма сын практикон ахуыртæ университеты ахуыргæнджыты разамындæй. Фыццаг хатдзæгты æмæ къабазы рæзты тыххæй нæ дарддæры æрмæг. Ныхасы бар Чехойты Фатимæйæн.
Медицинон халатты, нырыккон техникон фæрæзтæй пайдагæнгæйæ, æцæг специалистты хуызæн. Скъоладзаутæ фыццаг къахдзæфтæ кæнынц аграрон къабазы. Архайынц сæ алы къахдзæф æмæ ахуыргæнæджы ныхæстæ бахъуыды кæныныл. Цæмæй, цы зонындзинæдтæ исынц, уыдонæй фидæны пайда кæной.
Скъоладзаутимæ алывæрсыг куыст кæнынц фæлтæрдджын, сæ дæсныйад хорз чи зоны, ахæм хистæртæ – скъолайы æмæ Хæххон паддзахадон аграрон университеты ахуыргæнджытæ. Аграрон къабазы архайын æнцон куыст кæд нæу, уæддæр у цымыдисаг. Йæ цард йемæ сбæттын чи нысан кæны, уыдон ын йæ сусæгдзинæдтимæ зонгæ кæнынц профилон ахуыргæнæдоны.
Республикæйы ис 16 аграрон къласы. Уыдонæй 12 байгом кодтой районты скъолаты – зæххы куыст хъæуты цæрджытæй хуыздæр чи зоны!? Ууыл ныр сывæллæттæ æрмæст сæхи хæдзæртты нæ ахуыр кæндзысты, фæлæ скъолайы дæр.
Аграрон кълæстæ сты национ проект «Технологон ифтонгдзинад хойраджы æдасдзинады» -йы федералон проект «Аграрон комплексы кадрты» хай. Сæ иу афæдзы куыстæн дæр ис хорз бæрæггæнæнтæ. Сæ хатдзæгтæ æмæ фидæнмæ нысантыл ныхас цыд Хæххон паддзахадон аграрон университеты форум «Агрообразование – современные вызовы»-йы фæлгæты.
Аграрон кълæсты куыст æмæ сæ рæзт цымыдисаг æрмæст профилон министрæдтæн, скъолатæн æмæ уæлдæр ахуыргæнæндæттæн нæу, фæлæ амалхъом адæмæн дæр. Уыдонимæ бафыстой бадзырд. Ныр алы къласæн дæр фæзындзæн индустриалон æмкусæг. Уый æххуыс кæндзæн фидæны аграрон кусджытæн фыццаг къахдзæфтæ кæнынæн.
