Цæгат Ирыстоны Сæргълæууæджы уынаффæмæ гæсгæ, бирæ адæм кæм вæййы, ахæм организациты кусджытæ хъуамæ вакцинаци ацæуой 1-æм декабры онг
Сæ ахуырдзаутыл сæнкъард сты, æмæ сæ фæнды, куыд гæнæн ис, афтæ тагъддæр скъоламæ раздæхын. Республикæйы педагогтæ активондæрæй райдыдтой коронавирусы ныхмæ прививкæтæ кæнын. Ныртæккæ раздæры фæткмæ гæсгæ ахуыр кæнынц æрмæстдæр кæстæр кълæсты ахуырдзаутæ. Иннæтæн та сæ ахуыртæ цæуынц виртуалон кабинетты. Цæгат Ирыстоны Сæргълæууæджы уынаффæмæ гæсгæ, бирæ адæм кæм вæййы, ахæм организациты кусджытæ хъуамæ вакцинаци ацæуой 1-æм декабры онг. Куыд арæзт цæуы, коллективон иммунитет, уый тыххæй радзурдзæн Фидараты Маринæ.
Æппæт уроктæ, раздæрау, фæткмæ гæсгæ. Математикæ у бæлвырд наукæ. Ахуыргæнæг Ирина Тилик ма у директоры хæдивæг дæр. Уымæ гæсгæ куысты вæййы алы бон дæр. Скъолайы бæстыхайы ныртæккæ ахуыр кæнынц фыццæгæмæй – цыппæрæм кълæсты онг ахуырдзаутæ. Афтæмæй семæ æнцондæр у кусын. Æмæ сын цæмæй ахæм фадат дарддæр дæр уа, уый тыххæй хъæуы коллективон иммунитетыл бакусын. Низы ныхмæ буаргъæдтæ кæмæ нæй, уыдон активонæй райдыдтой вакцинаци кæнын.
Æрыдоны фыццæгæм скъолайы иммунитет ис педагогты 85 процентмæ, зæгъы скъолайы директор.
Ахсджиаг нысан ис информацион рухстауæн куыстæн. Æппæт æмбæлгæ бæрæггæнæнтæ ссарæн ис ахуыргæнæндоны официалон сайты. Педагогтимæ æмбарынгæнæн куыстæй дарддæр, скъолайы ис вакцинацийы тыххæй зæрдылдарæнтæ. Уым бæлвырд фыст ис, коронавирусæй хи куыд бахъахъхъæнæн ис, уый.
