Бахардз ыл кодтой 30 милуан сомы бæрц
Республикæйы пульмонологон центр райста нырыккон медицинон ифтонгарз. Бахардз ыл кодтой 30 милуан сомы бæрц. Ныртæккæ центры чи базæронд, уыцы техникæйы бæсты фæзынд ифтонгарзы 14 хуызы — балхæдтой рентген-аппарат, кардио-пульмонологон станцæ, кардиогрæф æмæ æндæр фæрæзтæ. Сæ руаджы медицинон куыстуат дзуапп дæтдзæнис нырыккон стандарттæн æмæ фæхуыздæр кæндзæн йæ куысты фæтк. Уыцы иу рæстæг рацарæзт домы рынчындоны бæстыхай дæр. Уæ зæрдыл уын æрлæууын кæндзыстæм — Владимир Путины хæслæвæрдмæ гæсгæ, бæстыхайы райарæзт бахастой сæрмагонд инвестицион программæмæ. Ацы аз уал федералон фæрæзты фæрцы сараздзысты проектон-сметон документаци. Медикон-техникон хæслæвæрд уал ныридæгæн сфидар кодта Уæрæсейы æнæниздзинадхъахъхъæнынады министрад. Рацарæзт та райдайдзæнис 2023 азы. Йæ фæрцы рынчындоны бынæтты бæрц зынгæ фæфылдæр уыдзæнис.
