Фæлхасадмæ цæстдарды регионалон управленийы разамонæджы ныхæстæм гæсгæ, медицинон кусæнуаттæм æххуысмæ чи фæсиды, уыдонæн се 80 проценты сты сывæллæттæ
Гриппæй рынчынтæ Цæгат Ирыстоны нæ рабæрæг, загъта аппаратон æмбырды сæйраг санитарон дохтыр Тыбылты Алан. Фæлæ республикæйы рæзы æхснырсæгæй рынчынты нымæц. Фæлхасадмæ цæстдарды регионалон управленийы разамонæджы ныхæстæм гæсгæ, медицинон кусæнуаттæм æххуысмæ чи фæсиды, уыдонæн се 80 проценты сты сывæллæттæ. Ведомствæйы сæргълæууæг загъта, гриппæй тестытæ æмæ вакцинаци кæныны бæрц фæфылдæр кæнын кæй хъæуы, уый . Республикæйы прививкæтæ скодтой 120 мин цæрæгæй фылдæр. Ахсджиаг бынат ахсынц профилактикон мадзæлттæ ахуыргæнæндæтты дæр. Æхснырсæджы тыххæй ахуыргæнæндæтты чи нæй, уыдон абон нысангонд 20 процентæй фылдæр не сты, фехъусын кодта ахуырады æмæ наукæйы министр Алыбекты Эллæ. Карантинмæ æхгæд кълæстæ ныртæккæ нæй.
Æмбырды ма дзырдтой, республикæ æппæтадæмон экспортон форум «Сделано в России»-йы кæй архайдзæн, ууыл. Уыдзæн 19-æм октябры Мæскуыйы. Экономикон рæзты министр Кучиты Зауыр куыд загъта, афтæмæй республикæ амалхъом адæмæн аразы гæнæнтæ æппæтадæмон равдыстыты архайынæн, стæй фæсарæйнаг æмкусджыты агурынæн. Абоны онг Цæгат Ирыстон бацæттæ кодта 2 экспортон контракты кæсаджы холлæгтæ æрвитынæй Гуырдзыстонмæ æмæ Абхазмæ. Дзанайты Барисы ныхæстæм гæсгæ, ацы хъуыддаг ахсджиаг у, æмæ бабар кодта, бынæттон амалхъом адæмимæ фылдæр æмбарынгæнæн куыст кæнын.
Адæмæн куыст дæттыны комитеты сæрдар Платы Альбинæ æмбæрды радзырдта, афæдзы райдианæй ведомствæйы æххуысæй, йе нæниздзинад хъыгдард кæмæн у, ахæм 45 адæймагæн куысты бынæттæ кæй самал кодтой. Абон комитет куыстдæттæгæн дæтты субсиди 72 мин сомы, инвалидты кусæн бынат сифтонг кæнынæн цы хæрдзæ æййафы, уый тыххæй.
