Ацы аз æдæппæтæй йæ фæллад суадзыны æмæ йе нæниздзинад фæхуыздæр кæныны фадатæй спайда кæныны бон у 32 мин сывæллонæн
Республикæйы райдыдта сæрдыгон дзæбæхгæнæн кампани. Ацы аз æдæппæтæй йæ фæллад суадзыны æмæ йе нæниздзинад фæхуыздæр кæныны фадатæй спайда кæныны бон у 32 мин сывæллонæн. Бацæттæ сын кодтой 142 фæзы. Дыууæ мин лæппуæйы æмæ чызджы абалц кæндзысты Краснодары краймæ Сау денджызы былмæ. Фидараты Маринæ радзурдзæн бæстондæр хабæрттæ.
Физикон-математикон лицей-интернаты 10-æм къласы ахуырдзау Анастасия Колесник ацы сæрды йæхи бафæлвардзæн педагогы хуызы. Сывæллæтты сæрдыгон лагеры иннæ хистæркъласонтимæ амондзысты бæлвырд наукæтæ райдиан æмæ астæуккаг ахуырдзаутæн. Анастасия равзæрста информатикæ. Сарæзта сæрмагонд сайт. Уым сывæллæттæн сæ бон уыдзæн ахуырты пълан фенын. Фидæны йæ фæнды ахуыргæнæг суæвын, æмæ йын ахæм практикæ у тынг ахсджиаг.
Лицейы иу радмæ ахуыр кæндзысты 100 адæймаджы онг. Се хсæн иннæ ахуыргæнæндæттæй минæвæрттæ дæр. Лæппутæ æмæ чызджытæ сæрдыгон каникултæм хуыздæр базондзысты математикæ, физикæ, информатикæ. Уый иу, фæлæ ма сæ рæстæг пайдаимæ рвитдзысты се мгæрттимæ дæр. Лагерь кусдзæн июны кæронмæ.
Сæрдыгон дзæбæхгæнæн кампанимæ цæттæ у сывæллæтты лагерь “Звездочка” дæр. Ам сæ фæллад суаддзысты 140 адæймаджы. Фæстаг рад та, традицимæ гæсгæ арвитыдзсты ирон æвзагыл. Сывæллæттæ ахуыр кæндзысты ирон æвзаг, традицитæ æмæ культурæ. Уымæй дарддæр ма цæудзысты экскурситæм музейтæм æмæ республикæйы зæрдылдарæн бынæттæм.
Сæрдыгон дзæбæхгæнæн кампанийы архайдзæн 142 фæзы. Се хсæн – скъолаты лагерьтæ, «Звездочка», стæй санаторий «Тæмискъ» æмæ пансионат «Урсдон».
Сæрды æртæ мæймæ сæ фæллад суаддзысты æмæ се нæниздзинад фæфидардæр кæндзысты республикæйы 19 мин сывæллонæй фылдæр. Уымæй дарддæр Цæгат Ирыстон бабæрæг кæндзысты 100 адæймаджы Черниговы æмæ Белгороды облæсттæй.
