Уый тыххæй ныхас цыд Битарты Вячеслав æмæ Мæскуыйы уæлдæр ахуыргæннæдæтты студенттимæ фембæлды.
Республикæйы разамынд архайдзæн, цæмæй Ирыстоны фæсивæдæй Уæрæсейы уæлдæр скъолаты чи ахуыр кодта, уыдонæн Райгуырæн бæстæйы кусыны фадат уа.
Уый тыххæй ныхас цыд Битарты Вячеслав æмæ Мæскуыйы уæлдæр ахуыргæннæдæтты студенттимæ фембæлды. Архайдтой дзы республикæйы хицауады сæрдары хæдивæг Азымты Иринæ æмæ фæсивæды хъуыдæгты фæдыл арæзт комитеты сæрдар Джусойты Руслан. Республикæйы сæргълæууæг бафиппайдта, Ирыстоны райрæзтæн кæй хъæуынц, нырыккон зонындзинæдтæ чи райста, ахæм æрыгон дæсны специалисттæ. Уымæ гæсгæ республикæйы сæргълæууæджы хæсмæ гæсгæ æххæстгæнæн хицауад цæттæ у студентты практикæйы райсынмæ. Йæхи дзы хорз чи равдиса, уыдонæн, гæнæн ис, æмæ ратдзысты куысты бынат. Лæппутæ æмæ чызджытæ Битарты Вячеславæн загътой бузныг. Радтой йæм сæ фарстатæ, æмæ æрдзырдтой сæ нысанты тыххæй. Радзырдтой, Мæскуйы уæлдæр ахуыргæннæдтты сæм арæх кæй вæййын национ культурæйы бонтæ, уым æндæр регионтæй студентты зонгæ кæнынц Цæгат Ирыстоны цардимæ. Фæлæ сын нæ фаг кæны национ уæлæдарæс, стæй æрмæджытæ стенд саразынмæ. Битарты Вячеслав хорзыл банымадта сæ хъæппæрис, æмæ бахæс кодта æххæстбарджын минæварæн, цæмæй студенттæн цæуа алывæрсыг æххуыс.
