Закъоны нысан у, ацы категорийы адæмæй 23 азы кæуыл сæххæст, уыдонæн уæлæмхасæн социалон æххуысы мадзæлттыл бакусын
Республикæйы Сæргълæууæг бахаста фæндон, сидзæр æмæ æвæгæсæгæй чи баззади, уыцы сывæллæтты цæрæнуæттæй ифтонг кæныны закъонмæ ивддзинæдтæ бахæссыны тыххæй. Закъоны нысан у, ацы категорийы адæмæй 23 азы кæуыл сæххæст, уыдонæн уæлæмхасæн социалон æххуысы мадзæлттыл бакусын. Нырмæ сын лæвæрдтой цæттæ цæрæнуæттæ. Ныр та сын закъоны проектмæ гæсгæ, дæтдзысты номыл конд документ уæлæмхасæн фæрæзтæ райсынæн, æмæ хæдзар сæхи фæндонмæ райсынæн. Республикæйы бюджетæй фæрæзты фæрцы сертификат сæ бон райсын уыдзæни, тæрхон кæмæн нæ уыди, карз нозт æмæ наркотиктæй чи нæ пайда кæны, æмæ алы мæй æфтиаг чи исы, ахæм адæмæн. Уæлæмхасæн фæрæзты бæрц нымад цæудзæни квадратон метры рæстæмбис аргъæй. Иу адæймагмæ 18 кв. метрæй къаддæр нæ хауы. Зæгъын хъæуы уый, æмæ спайда кæнæн уыдзæни мадæлты капиталæй дæр. Абоны онг, хæдзæрттæй сифтонг кæнын кæй хъæуы, уыцы рады ис 1461 адæймаджы. Уыдонæй 23 азæй хистæр сты 6 сæдæ дыууынæй. Ахæм уавæртæй спайда кæныны фæндон бахастой Уæрæсейы 18 субъекты, загъта республикæйы социалон политикæйы, æнæниздзинадхъахъхъæнынады æмæ ветеранты фарстаты фæдыл комитеты сæрдар Реуазты Ларисæ.
