Хаст сæм æрцыдысты Цæгат Ирыстоны зындгонд цæрджыты тыххæй æрмæджытæ
Республикæйы Сæргълæууæг Сергей Меняйло фембæлд авторты къордимæ. Йæ уæнгтæ кусынц Ирыстоны историйы тыххæй ахуыргæнæн чингуытæ фыссыныл. Разамынд та сын дæтты историйы æмæ археологоийы институты директор Бзарты Руслан. Бæстон ныхас кодтой, 5-7 кълæсты ахуырдзаутæн чингуытæ аразыныл. Хаст сæм æрцыдысты Цæгат Ирыстоны зындгонд цæрджыты тыххæй æрмæджытæ. Æмбырды ма архайдтой Хицауады Сæрдары хæдивæг Платы Альбинæ, ахуырады æмæ наукæйы министр Алыбекты Эллæ, Цæгат Ирыстоны паддзахадон университеты ректор Огъуаты Алан, стæй редакцион къамисы уæнгтæ.
Бзарты Руслан бавдыста ахуыргæнæн чингуыты макеттæ. Ныридæгæн æнтыстджынæй ацыдысты цалдæр экспертизæйы федералон æмвæзады. Иннæ къæпхæн та уыдзæн Уæрæсейы наукæты академийы экспертизæ. Сергей Меняйло Бзарты Русланæн æмæ авторты къордæн загъта бузныг, сæ ахадгæ куысты тыххæй. Стæй загъта, чингуыты хъуамæ канд биографийы цаутæ ма уой, фæлæ ма нæ зындгонд æмзæххонты уникалон историтæ дæр. Афтæмæй рæзгæ фæлтæр дæнцæг исдзысты райгуырæн зæхх уарзыны хъуыддаджы. Регионы разамонæг ма бахаста фæндон, цæмæй ацы куыстмæ здахой Цæгат Ирыстоны паддзхаадон университеты историон факультеты студентты ргом дæр.
