Йæ саразæг у сывæллæтты республикон библиотекæйы хайады хицау Кочиты Кларæ
Историон цаутæ, номдзыд æмзæххонтæ, Ирыстоны æнтыстдзинæдтæ. Республикæйы сæргълæууæг Сергей Меняйлойы æххуысæй мыхуыры рацыд сывæллæтты фыццаг энциклопеди «Мæ Ирыстон». Йæ саразæг у сывæллæтты республикон библиотекæйы хайады хицау Кочиты Кларæ. Чиныджы æмбырдгонд у йæ бирæ азты фæллой. Бæлвырддæр радзурдзæн Хъайтмазты Дзерассæ.
Энциклопеди «Мæ Ирыстон»-ы саразæг Кочиты Кларæ лæмбынæг æмбырд кодта газеттæй æмæ журналтæй уацтæ. Уыцы хъуыды йæм æрцыд 20 азæй фылдæры размæ. Сылгоймаг хъуыды кæны, интернет фæрæзтæ куы нæ ма уыд, уæд чиныгæн æрмæджытæ ссарын æнцон нæ уыд.
Энциклопеди «Мæ Ирыстон»-ы автор раргом кодта республикæйы наукон, культурон, экономикон къабæзтæ. Бирæ уацтæ баст сты хæстон тематикæимæ. Уыдоны чиныгкæсджыты бон базонæн у номдзыд æфсадфæтæгты тыххæй. Сæрмагонд æргом здæхт æрцыд Цæгат Ирыстоны историмæ. Кочиты Кларæйы хъуыдымæ гæсгæ, энциклопеди æрмæст скъоладзаутæн цымыдисаг нæ уыдзæн, фæлæ йæ адæм æмæ республикæ чи уарзы, уыдонæн се *ппæтæн дæр.
Ныртæккæ чиныг ссарæн ис Мамсыраты Дæбейы номыл сывæллæтты республикон библиотекæйы. Фæлæ азы кæронмæ энциклопеди уыдзæн горæты æмæ районты алы библиотекæйы дæр.
