Æмбырдæн разамынд лæвæрдта хицауады сæрдар Тускъаты Таймураз
Республикæйы сæрмагонд къамис æркастис, нысанон ахуырады бадзырдтæм гæсгæ чи ахуыр кæндзæн, уыцы абитуриентты номхыгъдмæ. Æмбырдæн разамынд лæвæрдта хицауады сæрдар Тускъаты Таймураз. Къамисы уæнгтæ сфидар кодтой, Цæгат Ирыстоны паддзахадон университеты, Хæххон-металлургон институты æмæ Уæрæсейы хицауады раз Финансон университеты Дзæуджыхъæуы филиалы чи ахуыр кæндзæн, уыдоны номхыгъд. Куыд раздæр, афтæ ныртæккæ дæр къамис æнцой кодта рауагъдонты фæлварæнты бæрæггæнæнтыл. Цас фылдæр баллтæ райста абитуриент иумæйаг паддзахадон фæлварæны рæстæг, уыйбæрц ын фылдæр бар ис йæ равзæрст дæсныйадмæ æнæ конкурсæй бацæуынмæ.
Абитуриенттæн сæ фылдæры фæндыдис ЦИПУ-йы студенттæ суæвын. Уым ныртæккæ ахуыр кæнынц ссæдз къабазмæ гæсгæ, фæлæ ахуырады министрады куыд бамбарын кодтой, афтæмæй нысанон бынæттæ се ппæт факультеттæм нæ радих кодтой. Зæгъæм, æнæ конкурсæй нæй бацæуæн психологийы, юриспруденцийы, æхсæнадимæ бастдзинад æмæ рекламæйы факультеттæм. Афтæмæй та уырдæм уыдис æппæты фылдæр курдиæттæ. Бирæты бафæндыд райсын экономисты æмæ лингвисты дæсныйæдтæ. Æндæрхуызон уавæр ис педагогон дæсныйæдтæм. Бынæтты бæрц курдиæтты нымæцæй у зынгæ къаддæр.
Уыцы хъуыддагмæ бæстон æркастысты къамисы уæнгтæ. Ныртæккæ республикæйы нæ фаг кæны педагогон дæсныйæдтæ æмæ уыцы уавæр аивынæн хъæуы рæзгæ фæлтæримæ раст профроиентацион куыст кæнын. Хæххон-металлургон институты абитуриенттæ арæхдæр æвзарынц информатикæ, арæзтад æмæ нымайæн техникæйы специалисты дæсныйæдтæ. Алы бынатмæ дæр ис æртыгай курдиæттæ. Финансон университеты филиал та радих кодта цыппар бынаты экономикæ, паддзахадон æмæ муниципалон разамынд, стæй менеджменты факультеттæм.
