Санаториты сæ æнæниздзинад фæфидардæр кæнын кæй фæнды, уыдоны нымæц бонæй бонмæ рæзы
Адæймаг йæхи взæр куы нкъара, йæ зæрдæйы куыстæй куы тыхса æмæ æвзæр куы фынæй кæна, уæд уый арæх вæййы коронавирусы фæстиуæг. Специалисттæ зæгъынц, уавæр сраст кæнæн æмæ æнæниздзинад фæхуыздæр кæнæн ис, ковиды фæстæ реабилитаци скæнгæйæ. Ногæй та йæ тыхы бацыд 7-æм мартъийæ фæстæмæ. Цавæр мадзæлттæ хаст æрцыдысты сæрмагонд программæмæ, æмæ кæдæм бацæуæн ис æххуысагур, уый тыххæй радзурдзæн Гуытъиаты Алинæ.
7 мартъийы нæ республикæйы сног кодтой коронавирусæй рынчынты реабилитаци. Санаториты сæ æнæниздзинад фæфидардæр кæнын кæй фæнды, уыдоны нымæц бонæй бонмæ рæзы. Галина Сапрановайыл цæуы 74 азы. Сылгоймаг æххæстæй банкъардта низы уæз. Дыууæ мæйы дзæбæх кодта амбулаторон фæткæй, йæ рæуджыты 15 проценты та уыдысты æфхæрд. Сылгоймаг куыд зæгъы, афтæмæй йын ныр дæр ма уæлдæф нæ фаг кæны. Æхсæв фынæй нæ кæны, зæрдæ йæ хъыгдары, стæй уайтагъд афæллайы. Галинæ куыд зæгъы, афтæмæй йæ уырны, санаторий йæ кæронмæ кæй сдзæбæх кæндзæн, уый.
Реабилитаци чи цæуы, уыдонæн ис сæрмагонд физкультурæ, цъыфæй ваннæтæ, туаггуыры коктейльтæ. Йæ фæрцы адæймагмæ парахатæй хæццæ кæны туаггуыр æмæ дзы æппæт къабæзтæ фаг æфсæст цæуынц.
Коронавирусы фæстиуджытæ сæхи алыхуызон равдисынц. Кæмæндæр уайтагъддæр, кæмæндæр та рæстæг куы рацæуы, уæд — зæгъынц дохтыртæ. Алы адæймагæн дæр снысан кæнынц хицæн дзæбæхгæнæн мадзæлттæ. Кæйдæрты бахъæуы хостæй дзæбæх кæнын дæр.
Реабилитацийы рæстæг хъуамæ рынчын хæра пайда хæринæгтæ. Сæрмагонд диетæ скæнынц рынчыны низмæ гæсгæ. Меню у хъæздыг æмæ адæймаджы æнæниздзинадæн пайдайаг.
Цæмæй реабилитаци ацæуай, уый тыххæй хъæуы райсын дохтыртæй амынддзинад. Рынчыны бон у равзарын æртæ профилактикон куыстуатæй иу. Уыдон сты санаторитæ Осетия, Сосновая роща æмæ геронтологон центр. Реабилитацийы мадзæлттæн бахъæудзæнис 12 боны.
