Сæдæгай азты дæргъы ноябры кæрон адæм æрæмбырд вæййынц бæрæгбоны фынджы уæлхъус æмæ фæкувынц нæлгоймæгты æмæ бæлццæтты бардуагмæ
Республикæйы цæрджытæ ацы къуыри бæрæг кæнынц ирон адæмы кадджындæр бæрæгбон – Джеоргуыба. Сæдæгай азты дæргъы ноябры кæрон адæм æрæмбырд вæййынц бæрæгбоны фынджы уæлхъус æмæ фæкувынц нæлгоймæгты æмæ бæлццæтты бардуагмæ. Фæкурынц дзы æнæниздзинад, сабырдзинад, фарн æмæ амонд. Джеоргуыбайы бæрæгбоны фæдыл Ирыстоны цæрджытæн раарфæ кодта республикæйы Сæргълæууæг Сергей Меняйло.
Республикæйы эпидемиологон уавæр, раздæрау, карз кæй у, уымæ гæсгæ фæлхасадмæ цæстдарды Управленийы специалисттæ сидынц адæммæ, цæмæй Джеоргуыбайы бæрæгбоны рæстæг сæхи бахизой дзыллон мадзæлттæй. Гæнæн æмæ амалæй скувой сæ хæдзæртты. Уый фæдыл Цæгат Ирыстоны цæрджытæм фæсидтысты Стыр Ныхасы минæвæрттæ.
