Разымынд сын лæвæрдта сæ гид – Роальд Каупуш
Сæрдыгон каникултæ пайдаимæ. Республикæйы цымыдисаг бынæттæм радон хатт абалц кодтой Алагиры фæсивæды минæвæрттæ. Разымынд сын лæвæрдта сæ гид – Роальд Каупуш. Чызджытæ æмæ лæппутæ атезгъо кодтой хъæды, базыдтой бирæ цымыдисаг хъуыддæгтæ, сæмбырд кодтой адæймаджы æнæниздзинадæн пайда кæрдæджытæ. Ахæм туристон балцытæ Алагиры хъæды техникумы ахуыргæнæг скæны арæх. Ацы хатт сæ балцæн æвдисæн уыдис не сфæлдыстадон къорд дæр, æмæ бæлвырддæр радзурдзæн Томайты Батраз.
Кæд æмæ куыд хъæуы æрæмбырд кæнын, адæймаджы æнæниздзинадæн пайда чи у, ахæм алыхуызон кæрдæджытæ. Роальд Каупуш алы зайæгойы тыххæй дæр радзурдзæн бæстонæй. Биологийы урок гом арвы бын, сæрмагондæй рæзгæ фæлтæрæн. Ахуыргæнæджы ныхæстæм гæсгæ, дзæбæхгæнæн кæрдæджытæ æрæмбырд кæнынæн хъæуы сæрмагонд зонындзинæдтæ. Зайæгойтæ иууылдæр нæ бæззынц. Кæцыдæртæн дзы хъæуы æрмæстдæр сæ хъæдтæ сæмбырд кæнын. Иннæтæн сæ сыфтæ, кæнæ сæ дидинджытæ.
Роальд Каупушы сывæллæттæ уарзынц. Акæны сæ цымыдисаг хæххон бынæттæм. Ацы экскурси сывæллæттæн фыццаг нæу. Æрæджы та уыдысты æфцæгыл.
Джедджын ахадгæйæ тох кæны бирæ низтимæ, зæгъынц специалисттæ. Пайда дзы кæнынц, адæймагæн йæ нервытæ хъыгдард куы вæййынц, уæд дæр. Уæвгæ джедджын у кæрдæг нæ, фæлæ къутæр. Вæййы дыууæ хуызы – урс æмæ сиреньхуыз. Сезоны къутæртæ фылдæр фæзайынц дурджын быдырты æмæ фæзуæтты. Турситон балцты куыст кæнын Роальд Каупуш райдыдта æрæджы. Уæвгæ, Алагиры скъоладзаутæн экскурситæ аразы рагæй. Къæдзæхтæ, бæлæстæ, цæугæдæттæ… Ацы бынæттæ тавынц адæймаджы уд, зæгъы Роальд Каупуш
Йæ сæйраг хæс у сывæллæтты æрдзмæ æмхиц кæнын, цæмæй уарзой æмæ хъахъхъæной æрдзон æвæрæнтæ. Кæстæртæм нæ алыварс дунемæ уарзондзинад гуырын кæнын хъæуы сабибонтæй фæстæмæ. Ахæм туристон балцы ацæуын йæ бон у, кæй фæнды, уыдонæн се ппæтæн дæр.
