50 азы размæ ацы ахуыргæнæндон арæзт æрцыд, бирæ рæстæг дзæбæх кæнын кæй хъæуы, уыцы сывæллæтты сдзæбæх кæнынæн. Уыцы хæс æххæст кæны абон дæр.
Коллективæн æмæ сывæллæттæн раарфæ кæнынмæ интернатмæ æрбацыдысты Цæгат Ирыстоны хицауады сæрдары хæдивæг Таболты Сергей æмæ республикæйы ахуырады æмæ наукæйы министр Огъуаты Алан.
Скъола-интернаты коллектив, ныййарджытæ æмæ сывæллæттæ бацæттæ кодтой бæрæгбоны программæ. Скодтой адджинæгтæ, Джызæлы героикон къорд азарыд йæ зарджытæ.
Уазджытæ дæр афтид къхæй не `рбацыдысты. Скъолайæн балæвар кодтой ног лабораторон – ахуыргæнæн кусæнгæрзтæ. Хуыздæр ахуыргæнджытæ хорзæхгонд æрцыдысты Уæрæсейы æмæ РЦИ-Аланийы ахуырады министрады Кады грамотæтæй. Скъолайы директор Магкаты Батырбегæн та республикæйы сæргълæууæджы номæй лæвæрд æрцыд «Ирыстоны кадæн» майдан.
Ацы ахуыргæнæндон нымад у хуыздæртæй иуыл. Ныртæккæ дзы се `нæниздзинад хуыздæр кæнынц, уыцы иу рæстæг ахуыргæнгæйæ, 280 сывæллоны. «Уымæ гæсгæ сын аразын хъæуы æмбæлгæ фадæттæ» – загъта Огъуаты Алан.
Бæстыхайы ис хорз медицинон æмæ ахуырадон кабинеттæ, сывæллæттимæ кæнынц хъомыладон æмæ æнæниздзинад фидаргæнæн мадзæлттæ.
Алыхуызон олимпиадæты æмæ конкурсты архайгæйæ, скъоладзаутæ хорз бæрæггæнæнтæ кæй равдисынц, уый дæр банымайæн ис сæ хъомылгæнджыты хорз куыстыл.
