Санкциты ныхмæ УФ-йы хицауады сæрдæр Дмитрий Медведев цы эмбарго сфидар кодта, уый фæлхасгæнджытыл куыд фæзындзæн, ууыл специалисттæ бирæ дзурынц.
Сæхиуыл та йæ фæлварынц дуканиты, ресторанты æмæ кафеты хицæуттæ.
Бынæттон продукттæ æмæ хойрæгтæ фæсарæйнæгтæй æвзæрдæр кæй не сты, уый æвдисæг равдыст бацæттæ кодтой Дзæуджыхъæуы ресторантæй иуы.
Куыд сбæрæг кодтой, афтæмæй, зæгъæм алыхуызон хæринæгты цæгатирыстойнаг цыхтытæ италиаг цыхтытæй бирæ хæрзаддæр сты. Уыимæ конд сты сыгъдæг æхсырæй, фæсарæйнæгтæй та уый зæгъæн нæй.
Норвегийæ ласт кæсаджы бæсты Ирыстоны ресторанты фæзындзæн Уæрæсейы скæсæйнаг хайы денджызты æмæ фурдты ахст кæсаг. Уæдæ хъулон — «мраморная» кæй хонынц, уыцы стуры фыдмæ та дард цæуын дæр нæ хъæуы. Ласдзысты йæ Липецкæй æмæ Кæсæг-Балхъарæй. Кæрчытæ ис нæхи маргъдарæн фабрикæты, фысы дзидза та Дагестаны.
Ресторанты куыстгæнджыты ныхæстæм гæсгæ, фæлхасгæнджытæ æппындæр ницы хъуаг уыдзысты. Хæринæгтæн нæдæр сæ ад аивдзæн, нæдæр зынаргъдæр фæуыдзысты. Уый нæ, фæлæ ма шеф- пъовæртæ æрхъуыды кодтой бирæ ног хæринæгтæ.
Кæд райдианты гыццыл фæтарстысты æмæ гуырысхо кодтой санкциты фæстæ куыд кусдзысты, ууыл, уæд ныр алцыдæр йæ бынаты сбадти. Æмæ куыд рабæрæг, афтæмæй æрмæст нæ бæстæйы регионты продукцийæ пайда кæнгæйæ дæр ис кусæн æмæ адæмы æфсаддзæн хæрзад æмæ хæрзхъæд хæринæгтæй.
Джиоты Георгий: «Тынг цæуынц мæ зæрдæмæ. Нæхи хæринæгтæ сты бирæ хуыздæр. Бирæ адджындæр æмæ зæрдæмæдзæугæ.
