Ныр 5 азы онг не хсæн нал ис, фæлæ баззад йæ ном æмæ йæ хорз хъуыддæгтæ
Режиссер, кинооператор, Уæрæсейы æмæ Цæгат Ирыстоны аивæдты сгуыхт архайæг, Уæрæсейы кинематографистты Цæдисы цæгаткавказаг хайады æнæивгæ сæрдар Гулуты Вячеславыл абон хъуамæ сæххæст уыдаид 85 азы. Ныр 5 азы онг не хсæн нал ис, фæлæ баззад йæ ном æмæ йæ хорз хъуыддæгтæ. 50 азæй фылдæр балæвар кодта кинойæн æмæ операторы аивадæн. Йæ куыстытæн аивадуарзджытæ æмæ критиктæ æппынæдзухдæр кодтой бæрзонд аргъ. Бирæ хæттыты-иу систы алыхуызон кинофестивальты хæрзиуджыты аккаг. Йæхæдæг йæхи тыххæй куыд дзырдта, афтæмæй йæ хъуыдыты уыди æрмæстдæр кинематограф. Æртæ хатты фæлвæрдта ахуыр кæнынмæ киноаивады Æппæтуæрæсеон паддзахадон институтмæ бацæуын, æмæ йын бантыст. Куыста зындгонд режиссертимæ, оператортимæ, киноактертимæ. 70-йæм азты Цæгат Кавказы кинохроникæйы студийы æрвылаз истой дыууæ кинонывы, стæй 48 киножурналы. Уыимæ ма документалон æмæ портретон кинонывтæ дæр. Гулуты Вячеслав стыр æвæрæн бахаста Ирыстоны киноаивадмæ. Йе стырдæр бæллиц та уыд Цæгат Кавказы кинохроникæйы студи сног кæнын. Бирæ фæндтæ æмæ нысантæ æврæдта йæ размæ, фæлæ йын, хъыгагæн, нал бантыст.
