Уый фембæлд Сергей Меняйлоимæ æмæ Нина Чиплаковаимæ, стæй бабæрæг кодта паддзахадон телерадиокомпани «Алани»
Цæгат Ирыстоны Сæргълæууæг Сергей Меняйло фембæлд Æппæтуæрæсеон паддзахадон телерадиокомпанийы генералон директоры хæдивæг, регионалон департаменты разамонæг, Уæрæсейы Æхсæнадон палатæйы информацион рæзты Къамисы сæрдар Рифат Сабитовимæ, стæй Æппæтуæрæсеон паддзахадон телераидокомпанийы филиал Паддзахадон телерадиокомпани «Алани»-йы директор, Цæгат Ирыстоны журналистты цæдисы сæрдар, Парламенты депутат Хъуысаты Тимуримæ. Рифат Сабитов радзырдта Цæгат Ирыстоны цы проекттæ æххæстгонд цæуынц, уыдоны тыххæй. Бæстон æрлæууыд нæ телерадиокомпанийы æрвылкъуырион программæйыл «СВОИ». Афæдзы рдæгæй фылдæр дзы æрныхас кæнынц ахсджиаг фарстатыл – сæрмагонд æфсæддон операцийы архайджытыл æмæ сæ бинонтыл. Республикæйы сæргълæууæгимæ фембæлды ма æрдзырдтой Æппæтуæрæсеон паддзахадон телерадиокомпанийы каналты аудиторийы тыххæй. Зæгъæм, канал Россия – 1 нымад у нæ бæстæйы æппæт телеканалты хсæн хуыздæрыл. Æхсызгон у уый, æмæ «Алани» канал «Россия – 1-ы фæлгæты бонмæ эфиры рацæуы 12 хатты. Уыимæ нæ республикæйы аудиторийы хсæн æвдисы бæрзонд бæрæггæнæнтæ. Сергей Меняйло бафиппайдта, нæ республикæйæн ахсджиаг кæй у федералон æмæ регионалон эфиры уæвын. Республикæ алы аз дæр æххуысы мадзæлттæ аразы цæгатирыстойнаг филиалæн. Уымæй дарддæр регионы сæргълæууæг хицауадæн бабар кодта, республикон бюджеты фæрæзтæ бавæрын паддзахадон телерадиокомпани «Алани»-йы национ радиойы æнæрлæугæ куыстæн, стæй аналитикон æмæ тематикон программæтæ аразынæн. Рифат Сабитов æмæ Хъуысаты Тимур республикæйы сæргълæууæгæн загътой бузныджы ныхæстæ, иумæйаг проектты царды уадзынæн ахæм æххуыс кæй цæуы, уый тыххæй. Стæй ма радзырдтой фидæны нысанты тыххæй дæр.
Рифат Сабитов ма бабæрæг кодта паддзахадон телерадиокомпани «Алани». Фембæлд журналисттимæ, æмæ сын радзырдта, куыд ахсджиаг у мадæлон æвзаг хъахъхъæнæг, æмæ йæ парахат кæныныл кусын. Бæрнон кусæг ма куыд загъта, афтæмæй радиохъуысынады программæтæ ирон æвзагыл кæндзысты фылдæр. Фидæны ахæм куыст цæудзæн телеуынынады дæр. Регионалон департаменты разамонæг ма сси æрвылкъуырион программæ «СВОИ»-йы архайæг. Аныхас кодтой сæрмагонд æфсæддон операциимæ баст ахсджиаг фарстатыл, стæй йæ архайджытæн æххуысы мадзæлттыл. Уæдæ æрлæууыдысты медиа-тыгъдады нымæцон трансформацийы æмæ фидæнмæ нысантыл дæр. Рифат Сабитов куыд загъта, афтæмæй егъау холдингы сæйраг хæстæм хауы, цы политикон цаутæ цæуы, уыдон æвдисын, æмæ идеологон хæсты цыд æргом кæнын.
Рифат Сабитов ма йæ кусæг фембæлды рæстæг бабæрæг кодта Цæгат Ирыстоны Æхсæнадон палатæ. Йæ сæрдар Нина Чиплакова радзырдта сæ ахсджиаг куысты тыххæй. æрдзырдтой ма, Мæскуыйы сæрмагонд равдыст саразыныл. Баст уыдзæн республикæйы 100 азы бонимæ. Ахсджиаг у республикæйы территорийы медиа-тыгъдады рæзтыл кусын, – загъта кадджын уазæг.
Рифат Сабитовы интервью æххæстæй уæ бон фенын уыдзæн абон канал «Россия 24»-йы. Программæ «СВОИ» эфиры рацæудзæн йæ нысангонд рæстæджы 17 сахаты æмæ 30 минутыл.
