Паддзахадон филармонийы сценæмæ рацыд Мариинаг театры зындгонд оркестр.
Æнæмæлгæ классикæ цæгатирыстойнаг сценæйы. Рихард Штраусы симфонион
поэмæйæ «Жизнь героя» райдыдта Дзæуджыхъæуы Куадзæны 17-æм Мæскуыйаг
фестиваль. Паддзахадон филармонийы сценæмæ рацыд Мариинаг театры зындгонд
оркестр. Егъау культурон цауы аивадон разамонæг у Гергиты Валерий. Маэстро
радон хатт ирыстойнаг аивадуарзджытæн балæвар кодта, ферох кæмæн нæй, ахæм
рæсугъд æнкъарæнтæ. Концерты дыккаг хайы та азæлыд Александр Скрябины,
фортепианойæн æмæ оркестрæн фыст уацмыс.
Солист – Гергиты Абысал. Æхсызгоныл нымад æрцыд уый, æмæ Валерийы фырт
дзæуджыхъæуккаг сценæмæ рацыд йæ фыдыфыд Абысалы райгуырæн бон. Куадзæны
Мæскуыйаг фестиваль нæ республикæйы цæуы 5-æм хатт. Уæвгæ та Мариинаг театры симфонион оркестр фыццаг хатт
нæ республикæмæ ссыд 2008-æм азы. 17-æм сезон уыдзæн æппæтæй дæргъвæтиндæр. Музыкалон марафон цæудзæн 32
боны.
