Зæгъæм, программæ æххæст кæнгæйæ, ныййарджытæн сæ бон уыдзæн путевкæйы аргъы 50% фæстæмæ райсын
Ростуризм расидти сæрмагонд программæ, æмæ уый фæрцы сывæллæтты фæлладуадзæн лагерьтæм уыдзæн æнцондæр арвитæн. Зæгъæм, программæ æххæст кæнгæйæ, ныййарджытæн сæ бон уыдзæн путевкæйы аргъы 50% фæстæмæ райсын. Ацы программæйы архайджытæй иу у нæ республикæйы сывæллæтты лагерь Тæмискъ. Мингай лæппутæ æмæ чызджытæ уым хъæлдзæгæй æрвитынц сæрдыгон каникултæ. Уымæй дарддæр ма фæфидардæр кæнынц се нæниздзинад, æмæ æфтауынц се сфæлдыстадон хъомысыл. Куыд бацæттæ кодтой санаторийы ацы аз та, уый тыххæй радзурдзæн Гуытъиаты Алинæ.
Сæрдыгон дзæбæхгæнæн кампанимæ Тæмисчъы санаторийы рагæй цæттæ кодтой. Сæрмагондæй æркусын кодтой физиотерапевтон æмæ реабилитацион хайæдтæ, сцалцæг кодтой агъуыстытæй иу. Ведомствæты хсæн сæрмагонд къамис лæмбынæг сбæрæг кодта санаторийы уавæр, федта кабинеттæ, палатæтæ æмæ рахаста хатдзæг, центр фæлладуадзæн афонмæ цæттæ кæй у, уый тыххæй. Тæмисчъы санаторий ацы аз байгом уыдзæнис 12 июны. Фæлæ йæ ацы хатт, Уæрæсейы фæлхасадмæ цæстдарды домæнтæм гæсгæ, æвдай проценты йеддæмæ нæ байдзаг кæндзысты.
Тæмискъ нымад у дзæбæхгæнæн лагерыл. Алы сывæллонмæ дæр æппæты фыццаг æркæсынц дохтыртæ — неврологтæ, педиатртæ, физиотерапевттæ, кардиологтæ æмæ ортопедтæ. Кæд ын йе нæниздзинадыл фæгуырысхо вæййынц, уæд æй арвитынц узимæ. Санаторийы ис йæхи лаборатори дæр.
Алы сывæллонæн дæр саразынц реабилитацийы хицæн программæ. Зæгъæм, рæуджыты низтæй чи сæйы, уыдонæн ис ингаляторий. Амонынц æй, пневмония, бронхит, тонзиллит æмæ фарингитæй чи фæрынчын, уыдонæн. Ингаляторы маскæйæн та алы адæймаджы фæстæ дæр кæнынц бæстон дезинфекци.
Гидромассаж, дзæбæхгæнæн физкультура, тренажерты зал. Санаторийы кæсынц æрмæст сывæллæтты æнæниздзинадмæ нæ, фæлæ сæ удæнцойдзинадмæ дæр. Уæрæсейы фæлхасадмæ цæстдарды домæнтæм гæсгæ, иу агъуысты ис æрмæстдæр цыппар адæймаджы. Душ æмæ уазæгдон сты уæладзыджы. Сæ бон сæхимæ зилын кæмæн нæу, уыцы сывæллæттæн та ис сæрмагонд агъуыст. Уым ис бынат, чи йæм кæсы, уыцы адæймагæн дæр.
Тæмисчъы сывæллæттæ æрмæст се нæниздзинад нæ фидар кæнынц, фæлæ ма кусынц се сфæлдыстадон хъомысы райрæзтыл дæр. Ам сæ бон у æрхъуыды кæнын мультфильмтæ кæнæ та æлыгæй истытæ саразын.
Санаторийы куыд зæгъынц, афтæмæй сфæлдыстады уылты сывæллæттæн рæзы сæ курдиаты тæваг æмæ сæ ахуыр кæны цардмæ æндæр цæстæй кæсын. Уымæй уæлдай сфæлдыстады фæрцы сæхицæн ссарынц ног æмбæлттæ, æнцондæрæй сæхи фенкъарынц ног уавæрты. Мæнæ ацы ран бамбæхсынц сæ тæссаг æнкъарæнтæ, ацы хæдзары та фæзæгъынц сæ бæллицтæ æмæ сусæгдзинæдтæ.
Тæмисчъы санаторий райста грант цыппар милуаны æмæ фондзсæдæ мин сомы бæрц, царды зын уавæрты чи ис, уыцы сывæллæттæн æххуысы фонды фæрцы. Йæ руаджы сараздзысты мобилон реабилитацион центр, нæ республикæйы дæрддзæф районты чи цæры, уыцы сывæллæттæн. Уыдзæнис дзы физиотерапевтон кабинет, стæй дæтдзысты логопеды лæггæдтæ.
Ацы аз сæрдыгон-дзæбæхгæнæн кампанийы рæстæг се нæниздзинад фæфидардæр кæндзысты 28 мин сывæллоны. Скъолаты лагерты сæ фæллад суаддзысты æвддæс мин скъоладзауы, цыппæрдæс мин сыавæллоны та сæ рæстæг арвитдзысты æрдзы хъæбысы. Æхсызгон хабар ныййарджытæн. Сæ сывæллæттæн лагертæм балцæгтæ чи æлхæны, уыдонæн ис фадат туристон кешбекы программæйы архайынæн æмæ йын йæ аргъы фæндзай проценты фæстæмæ райсынæн.
Уыцы фадатæй спайда кæнын сæ бон у, фæкæсынхъуагыл нымад чи не сты, уыцы бинонтæн дæр.
