Арæзт æрцыди Мæскуыйы, «Уæрæсейы креативон къуыри» æххæстгæнгæйæ
РЦИ-А Сæргълæууæг Сергей Меняйло архайдта, культурæйы къабазимæ баст паддзахадон Советы къамисы æмбырды. Арæзт æрцыди Мæскуыйы, «Уæрæсейы креативон къуыри» æххæстгæнгæйæ. Цæгат Ирыстоны разамонæг докладимæ раныхас кодта, регионы адæмон сфæлдыстадон æрмдæсныйады райрæзтæн æххуыс кæныны мадзæлтты тыххæй. Куыд фæнысан кодта, афтæмæй ирон цардыуаджы культурæйы аивадон æрмдæсныйад ахсы ахадгæ бынат. Традицион хуызтæм республикæйы хауынц хъæды æмæ згъæры куыст кæнын, æндахæй быйын, керамикæ, зæрингуырды æмæ нымæты куыст, национ уæлæдарæс хуыйын, национ куклатæ æмæ музыкалон инструменттæ аразын.
Абон Цæгат Ирыстоны адæмон æрмдæсныйады къабазы кусы 10 организацийы æмæ 50-йы бæрц та хицæн амалхъом адæм. Уымæй уæлдай, бирæ ис хицæнæй чи кусы, ахæм къухдæснытæ. Сæ нымæц рæзы, регионы туризм кæй рæзы, уый фæрцы дæр. Сергей Меняйло куыд загъта, афтæмæй республикæйы стыр куыст цæуы адæмон æрмдæсныйад парахат кæнынæн. Бындур æвæрд æрцыди сæрмагонд ассоциацийæн дæр. Рæстæгæй – рæстæгмæ арæзт цæуынц равдыстытæ, дæсныйадæвдисæг ахуыртæ. Афтæ, афæдзы райдианæй бацæттæ кодтой 22 дæсныйадæвдисæг ахуыры, стæй нæ республикæйы минæвæрттæ архайдтой 5 егъау равдыст-армукъайы. Республикæйы Сæргълæууæг бахаста фæндон, Уæрæсейы промышленносты æмæ базарады министрады æмвæзадыл æххуыс чи исы, регион уыцы субъектты хыгъдмæ бахæссыны тыххæй. Ахæм хуызы, раргом уыдзæн бирæ æрмдæсныты курдиат, æмтгæй райсгæйæ та фæахъаз уыдзæн ацы къабазы райрæзтæн. «Уæрæсейы креативон къуыри» арæзт цæуы 2020-æм азæй нырмæ. Форум иу кæны бæстæйы креативон индустрийы минæвæртты.
