Нырæй фæстæмæ республикæйы чысыл хъæуты æмæ горæтты бизнесменты консультаци райсынмæ æмæ гæххæттытæ скæнынмæ
Цæгат Ирыстон сси Уæрæсейы фыццаг регион, амалхъом адæмæн æххуысы инфраструктурæ районты кусын кæм райдыдта, ахæм. Нырæй фæстæмæ республикæйы чысыл хъæуты æмæ горæтты бизнесменты консультаци райсынмæ æмæ гæххæттытæ скæнынмæ Дзæуджыхъæумæ цæуын нал хъæудзæн. Центр «Мой бизнес»-ы минæвæрттæ сын фембæлдтытæ аразынц районты бынæттон администрациты. Амалхъом адæмæн æххуысы
Акъоты Ангелинæйы бинонтæ фос дарыны куыст фыццаг аз нæ кæнынц. Фæлтæрддзинад сæм ис, æмæ сфæнд кодтой сæ архайд фæуæрæхдæр кæнын. Сæ фермæ фестырдæр кæныны фæндон сæм рагæй уыди. Сæрды райдиан Дыгуры районы амалхъом адæмæнæ æххуысы фонд куы фæзынд, уæд æрыгон чызг бацыд консультацимæ.
Хъæууон хæдзарады программæйы бацархайын фадат дæтты бизнесы рæзтæн. Уавæртæ Ангелинæ банымадта хорзыл. Баззади ма йын гæххæттытæ бацæттæ кæнын. Æмæ та ногæй æххуысмæ æрбацыдысты центры специалисттæ.
Æппæтæй арæхдæр цы фарстатæ дæттынц, уыдонæй иу у – пандемияйы рæстæг цавæр æххуысы мадзæлттæ цæуынц, уый. Уымæй дарддæр ма ам консультаци кæнынц фонды æппæт лæггæдты тыххæй.
Мæйы размæ ахæм æххуысы центр байгом Кировы районы. Бынæттон администрацийы фыццаг уæладзыджы хицæн кабинет «Мой бизнес». Йæхимæ хоны амалхъом адæмы. Ацы мгъуыдмæ йæм бирæ адæм æрбацыд. Сæ фылдæр, кæй зæгъын æй хъæуы, райдайгæ бизнесментæ.
Кировы районы чысыл бизнесы куыстуæттæ бакусынц 80% продукци. Сæ фылдæр сты хъæууон хæдзарадæй, базарадæй æмæ лæггæдты къабазæй. Уымæ гæсгæ ахæм центр стыр æххуыс у бынæттон бизнесæн, зæгъынц муниципалон сконды специалисттæ.
Центр «Мой бизнес» районты фæстауæрц кæны рæстæг, зæгъынц амалхъом адæм. Ома сæ алы фарстайы фæдыл Дзæуджыхъæумæ цæуын нæ хъæуы. Лæггæдтæ кæнынц лæвар, æмæ уый дæр ахсджиаг хъуыддаг у. Æххуысы фонды консультацитæгæнæн кабинеттæ байгом сты республикæйы æппæт муниципалон скондты дæр. Æнæмæнг хъæугæ кæй уыдысты, ууыл дзурæг у статистикæ. Фарон фонды лæггæдтæй спайда кодтой 9000 адæймагæй фылдæр. Уыдонæй 90% сты районты цæрджытæ.
