РЦИ – Аланийы министрадтæ æмæ профцæдистæ æмгуыстады бадзырд бафыстой Кæсæг-Балхъары профцæдистæ, стæй транспорт æмæ фæндæгты хæдзарады министрадимæ.
Нысан кæнынц кæрæдзийы фæлтæрддзинадимæ зонгæ кæнын, се ‘мгуыстад парахатдæр кæнын, фæндæгты арæзтад æмæ цалцæджы, стæй транспорты фарстатæ иумæйагæй хуыздæр кæнын. Цæгат Ирыстоны æмæ Кæсæг-Балхъары минæвæрттæ сæ цæст дардзысты республикон программæтæм, цæмæй дыууæтæн дæр уой ахадгæ. Уымæй уæлдай иумæйагæй архайдзысты Цæгат-Кавказы федералон зылды программæтæм гæсгæ кусыныл. Зæгъæм, административон фæдаджы иу хайыл фæнд кæнынц, цалдæр æрдæм чи цæудзæн, ахæм фæндæгтæ саразын. Уыдзысты æфсæнвæндаджы иуфæрсты. Проекты фæрцы дыууæ республикæйы бæлццæттæн дæр уыдзæн бирæ æнцондæр. Фæлæ уæддæр, ацы бадзырды ахсджиагдæр нысан у, хæлардзинад фидар кæнын.
