Чиныг рацыд ирон адæмы национ – культурон паддзахадон программæмæ гæсгæ 300 экзкмплярæй
Уæрæсейы адæмы хæттыты культурон бынты афæдз Цæгат Ирыстоны гуманитарон æмæ социалон иртæстыты институт байгом кодта зæрдылдарæн цауæй. Рухс федта, рæгæй кæмæ æнхъæлмæ кастысты, уыцы рауагъд «Алания от А до Я». Чиныг рацыд ирон адæмы национ – культурон паддзахадон программæмæ гæсгæ 300 экзкмплярæй. Программæмæ йæ цæст дары Цæгат Ирыстоны национ политикæйы æмæ æддагон бастдзинæдты министрад, проектыл кусын райдыдтой 2016–æм азы. Арæзт æрцыд, ирон ахуыргæндты бирæ азты куыстытыл æнцойгæнгæйæ. Проекты автортæ сæ размæ æвæрдтой хæс – ирон адæмы культурон бынтæ бахъахъхъæнын, адæмы удварны хæзнатæ равдисын, куыд хъахъхъæд цыдысты æмæ рæзыдысты рæстæджы цыдимæ. Чиныджы иртасæн куыстытæй дзуапп ссардзысты, абоны æмæ фидæны фæлтæртæ сæ уидæгтæ кæцæй сты, уыцы фарстайæн. Чиныг цымыдисаг уыдзæн канд наукон æхсæнадæн нæ, фæлæ хуымæтæг чиныгкæсджытæн дæр. Пайдайаг уыдзæн æнæхъæн адæмы хатты культурон бынты истори æмæ наукон зонындзинæдтæ райсынæн.
